Дагъустан Республикадин Гьукуматдин Председателдин заместитель Мурад Къазиев РД-дин илимдин ва образованидин министерстводин экономикадин, финансрин ва конкурсрин управленидин начальник Марат Абдулгьамидовахъ галаз санал бажарагълу аялрин “Альтаир” центр эцигун патал чара авунвай чилиз килигиз фена. Идан гьакъиндай редакциядиз РД-дин илимдин ва образованидин министерстводин пресс-къуллугъди хабар гана.
Ведомствода къейд авурвал, республикадин Кьили бажарагълу аялар жагъурунин ва абуруз куьмек гунин карда кьилин роль къугъвадай Центр патал Тарки-Тау дагъдин къваларив гвай РД-дин Кьилин резиденция ва 14 гектар чил вахкана. Идан гьакъиндай талукь тапшуругъдал къул чIугунва ва РД-дин Гьукуматди кIелдай корпусдин ва 240 кас патал общежитидин проектар гьазурзава. Дараматар къведай йисан сентябрдиз ишлемишиз вахкудайвал я.
“Альтаир” центрада гьар вацра 200 аялди пулсуз кIелда. Абурухъ галаз тарсар илимдай, искусстводай ва спортдай тухуда. Центрадиз бажарагълу аялар вири районрай ва шегьеррай хкяда.
«Лезги газет»
