“Айболит”

—           Япара ван гьатнавайла, сес зайиф хьан­вайла, са вацран вахтунда япариз ба­дам­дин ягълудин 7-8 стIал вегьин хийирлу я.

—           Жалгъаяр ва далу тIазвайла, гьуь­луьн­ кьел, хуьрекдин сода, кьуру гор­чица ва вирт (гьар сад са чайдин тIу­руна авайди) вири сад-садак какадарна, тIазвай чкайривай гуьцI­­да, винелай полиэтилендин пакетдалди­ ва чими шарфуналди кIевда. Экуьнахъ чи­ми цел­ди чуьхуьн хъийида. Ихьтин вад процеду­ра авурла, тIал секин жеда. И процедура­ ийи­дайла, уькIуь, цуру ва туькьуьл шейэр ишле­мишна виже къведач.

—           Рапар ягъайдалай гуьгъуьниз къалчахдик дакIунар кумайла, пекинал са тIимил  къатух вегьена, дакIур чкайрал эцигна, винелай полиэтилендин пакетдалди кIевирна, тIа­рам шалвар алукI­да. Са суткадилай дакIу­нар­ амукьдач.

—           МетIер тIазвайла, каланхоэдин пешер ва тан куьлуь авуна, 0,5 литрдин путулкадиз вегьена, винелай эрекь илична, са гьафтеда тада ва гьар юкъуз путул­ка юзурда. Ахпа ам тIазвай ме­тIе­ривай гуьцIда. Ихьтин къаришмади тIал фад секинарда.

—           Юкьва кпул авайла, “Тройной” оде­ко­лон, са шуьшеда авай валерианка, шуьшедин са кьатIа авай 5% йод, регъвенвай анальгиндин 6 таблетка вири сад-садак какадарна, 5 юкъуз кIвалин гьа­вада тада. Ахпа ам, хъсандиз юзурна­, ксудалди вилик тIаз­вай чкайривай гуьцI­да.

—           Ивидин гемоглобин  агъуз аватнавайла, са истиканда авай регъвенвай гречка, кIе­рецдин гьакьван хвехвер ва са истикан вирт ви­ри сад-са­дак хъсандиз хуькуьрна, хо­л­о­диль­­никда хуь­да. Ахпа гьар экуьнахъ ва ня­­нихъ ичIи рикIе­лай хуьрекдин са тIуруна авайди ишлемишда.

—           Ири чарара (12 перстный ратуна)  хер авайла, 50 г прополис ракьай яна, банкадиз вегьена, винелай 250 мл 70 процентдин спирт илична, тада. Про­полис спиртда цIрайдалай гуьгъуьниз йи­къа пуд сеферда, фу нез 30 декьикьа амайла, чайдин са са тIуруна авайди ишлемишда.

—           Иммунитет хкажун  патал сенжефилдин (имбирь), лимондин мижеяр ва вирт (ви­ри­ сад хьтин паяр) сад-садак ка­кадарна, йи­къа­ пуд сеферда, фу нез 30 декьикьа амайла, хуьрекдин са тIуруна авайди ишлемишда.

—           ДуркIунра къван авайла, агъа­дихъ­ галай рецептдикай менфят къачуда:

1,5 кг газарар ва цилер авачир кишмишрин­ зур кило хъсандиз чуьхвена, ка­тулдиз вегье­на, 1,5 л яд илична, ргаз пи­чинал эцигда­. Къа­ришма ргаз башламишайла, худ агъузна,­ къал­пагъ эцигна, 2 сятда тада. Ахпа ам куьз­на­, йикъа пуд се­ферда, фу нез 30 декьикьа амайла, 100 мл ишлемишда.

Гьазурайди — Надият  Велиева