22-ноябрдиз, COVID-19 азардиз акси раб (“Спутник V” вакцинадин кьве компонентни) яна тамам зур йис алатайла, Докъузпара райондин кьил Мегьамед  Шамилова  тIугъвалдиз акси раб (ревакцинация) мад сеферда яна. Идакай райондин пресс-къуллугъди хабар гузва.

Пешекарри къейдзавайвал, COVID-19 азардиз акси рапунин къуват зур йис алатайла зайиф, яни инсандин бедендик ам ягъайла акатзавай антителайрин кьадар тIимил хьун мумкин я. М.Шамилова, пешекаррин меслятрал амал авун яз,  нубатдин сеферда “Спутник Лайт” вакцина яна.

“ТIугъвалдиз акси раб ягъайдалай кьулухъ 3 сят алатнава, зи кефияр хъсанзава. ЧIу­ру са лишанни авач” — хабар ганай ада вичин гьалдикай.

22-ноябрдиз авай малуматралди, До­къуз­пара районда 6119 касди COVID-19 азардиз акси рапар янава. Ида коллективный иммунитет арадал атун патал рапар яна кIан­завай агьалийрин кьадардин 85,74 % тешкилзава.

— Зун умудлу я, райондин агьалийри, залай чешне къачуна, коллективный иммунитет арадал атун патал лазим тир вири ксари зулун эхирдалди азардиз акси рапар яда, — алава хъувунва М.Шамилова Инстаграм сетда авай вичин чина.

РикIел хкин:  COVID-19 азардиз акси раб ягъун къенин юкъуз и азардикай хуьзвай виридалайни менфятлу рехъ я.

Чи  мухбир