Чи алимар
И йикъара чав шад хабар агакьна: илимдинни практикадин, илимдин агалкьунар уьмуьрда кардик кутунин, илим ва техника, технологияр вилик тухунин лайихлувилерай Дербентда кардик квай Вирироссиядин набататчивилин институтдин (ВИР-дин) тежрибайрин станциядин илимдин кар алай (ведущий) къуллугъчи, къуьлуьн суьрсетрин генетикадин отделдин заведующий, биологиядин илимрин доктор Асеф Зилфикъарович Шихмурадоваз РД-дин Кьил С.Меликован Указдалди (2021-йисан 13-июль, 135-нумра) “Дагъустан Республикадин илимдин лайихлу деятель” лагьай гьуьрметдин тIвар ганва. Ам чидай вирибуру, сифте нубатда, тIвар кьунвай илимдин станциядин къуллугъчийри и кардал шадвалзава, алимдиз тебрикар рекье твазва.
Асеф Зилфикъарович заз фадлай чида. Ада илимрин кандидатвилин, гуьгъуьнлай докторвилинни диссертацияр хвейила, чи газетдин патай тебрикарни рекье турди я. Гила цIийи арш, цIийи дережа къазанмишнава.
Лайихлу алимдин илимдин кIвалахдин важиблувал, хийирлувал квекай ибарат я? Адан къуллугъдин тIварцIи раижзавайвал, Асеф Зилфикъарович ва адан гъилик кIвалахзавай къуллугъчияр чи республикадин накьварал, иллаки, чеб тIебии шартIарал гьалтайла, са акьван къулайбур, къенибур тушир, кьелер пара квай чилерал техилдин, вични кIеви сортарин ва гзаф бегьер гудай къуьлуьн жинсер ахтармишунал, абур битмишарунал машгъул я.
Илимдин нетижаяр чи республикадин ва гьакI Урусатдин маса регионрани фадлай кардик кутунва. Къулайсуз шартIар авай мулкарал кьакьан бегьерар битмишарзавайдакай жуьреба-жуьре изданийра, симпозиумринни конференцийрин документра къейднава. Гила алимдин агалкьунриз кутугай къиметни ганва. Генетикадин илим вилик тухунин кар генани гужлу жедайдал шак алач…
А.З.Шихмурадов 1964-йисан 1-январдиз Докъузпара райондин Миграгъ-Къазмайрин хуьре дидедиз хьана. Миграгъа юкьван школа, Махачкъалада Дагъустандин хуьруьн майишатдин институтдин (гила — аграрный университет) агрономвилин факультет акьалтIарна. 1989-йисалай инихъ чун инал рахазвай институтдин тежрибайрин станцияда кIвалахзава. ГъвечIи къуллугъчидин дережадилай ам отделдин заведующийдин дережадиз кьван хкаж хьанва.
1997-йисуз тIвар кьунвай хиляй илимрин кандидатвилин, 2014-йисуз докторвилин диссертацияр хвена.
Адан гъиликай вичи хкянавай хиляй (къуьлуьн генетикадай) 2 монография, 90-дав агакьна илимдин макъалаяр, теклифар, каталогар хкатнава. Илимдинни тежрибайрин кIвалах ада Дербентда кардик квай институтра студентриз тарсар гунихъ галазни алакъа авунва. Яни илимдин жегьил къуватар тербияламишзава.
Чна Асеф Зилфикъаровичаз къачунвай дережаяр рикIин сидкьидай мубаракзава:
Зайиф жедач ЧIехи вацIун гьерекат,
Ви гъиликни — чи чилерин берекат.
Мад генг хьурай илимда ви къадамар,
Эбедивал къачур саягъ Адама…
Мерд Али
