Захавал квай хва
Чи газетдихъ галаз фадлай алакъа хуьзвай авторрикай сад Буба Меликов я. Ам 1951-йисуз Кьасумхуьрел дидедиз хьана. Хуьре юкьван школа, Буйнакскда финансрин техникум, Ростовда халкьдин майишатдин институт акьалтIарна. Махачкъалада, СтIал Сулейманан, Къумторкъала, Къизилюрт районра финансрин рекьяй жуьреба-жуьре къуллугъар бегьемарна.
Амма руьгьдай ам лирик-шаир я. Гьеле мектебда амаз ада эсерар кхьизвай. Абур райондин ва республикадин газетриз, “Самур”, “Кард” журналриз, умуми кIватIалриз акъатна. 2008, 2009-йисара адан “Муьгьуьббатдин нурара” тIвар алай шииррин ктаб лезги ва урус чIаларал акъатна.
Адан хейлин чIалариз (“Лезги руш”, “Анфиса”, “Эрзиман”, “Акуна заз…” ва масабур) композиторри гьаваяр кхьенва, абур чи манидарри мехъеррикни межлисрал мукьвал-мукьвал тикрарзава.
Буба Меликова гьикаятдани вичин алакьунар раиж тавуна туш. Автор кьисметди Къизилюрт райондин Темиргоедиз акъудна, ана хизан кутуна.
Маса миллетрин юкьва яшамиш жез, ада хайи чIалаз хвавилелди къуллугъзава. Хейлин ксарикай метлеблу очеркар, зарисовкаяр кхьена. Халкьарин дуствилин, хизан хуьнин ва мягькемарунин, инсандин ва тIебиатдин саламатвал хуьнин месэлайрайни газетда адан макъалаяр тIимил чап хьанач.
Б.Меликов дустарал рикI алай, абур хуьз гьазур рухвайрикайни сад яз чида. Вичин патай ада лап гзаф ксариз абур хайи йикъариз жуьреба-жуьре тебрикар рекье тваз хьана.
Буба Меликов РФ-дин журналистрин Союздин член, гьукуматдин ва жуьреба-жуьре тешкилатрин, ведомствойрин патай ганвай шабагьрин (медалрин, грамотайрин) сагьиб я.
Мерд Али
