Гатфарал ашукь хьайи шаир-ханум

Чи эдебиятдиз фад атана, гьакьван фад хъфей авторар садни кьвед туш. Белки, абурун кьисмет гьахьтинди я жеди. Гатфарин лейсан хьиз, са геренда чилерал авахьна, дуьньядиз берекатлу нурар, мижедин стIалар, атирар багъишна, хъфизва.  Ам­ма чпин эсерлувал квадарзавач. Абуру инсанрин рикIера дурумлудаказ чка кьазва.

Ихьтин авторрикай сад, чи фикирдалди, вич 1951-йи­суз КцIар райондин Хуьрелрин хуьре дидедиз хьайи  Эфруз  Регьимова  я. Ада хуьре юкьван мек­теб, Бакуда Азербайжандин госуниверситетдин библиотечный факультет акьалтIарна, хейлин йиса­ра вичин пешедай кIвалахна. Ктабханайра чIугур зегь­мет ада чIалан эсерар кхьинихъ галазни ала­къа­лу авуна. Абур Бакуда, КцIара, Махачкъалада жуьреба-жуьре газетрани журналра чапна.

2006-йисуз Эфруз Регьимовадин “Яран сувар” тIвар алай кьилдин ктаб акъатна. Гьа йисуз вичин ктабни гваз ам чи газетдин редакциядиз мугьман хьанай. Гьелбетда, цIийи авторди ва гьакI адан эсеррин цIийивилини чи фикир желбнай.

Эфруза сифте яз лезги шииратда гатфарин лап гуьзел суваррикай  сад тир Яракай гьакьван метлеблу пьеса (тамаша) кхьенвай. Ктабда гьатнавай вири  шиирарни гьакьван верцIи чIалал кхьенвай гатфаринбур я. Чна гьавиляй адаз гатфарал ашукь шаир-ханум лагьанва.

Гьайиф чIугваз тазвайди а кар я хьи, шаир, гзаф майилар, фикирар рикIик  кумаз, рагьметдиз фена. Амма тIимилди ятIани, адан ирс чав гума. Эфрузан ктабдай хейлин чIукар чна гьар йисан гатфариз — Яран сувариз чи кIелзавайбуруз теклифна. Абуру хайи чIалан хазинадал рикI алай вирибурун патай разивал гъана­. ГьикI хьи, шаирдин чIал лезги халкьдин сивин яратмишунриз хас мисалралди, мис­кIалралди, манийралди девлетлу я. Идалайни артух, чаз чи халкьдин къадим вахтарин хуьрекрин, парталрин, гуьрчег затIарин, къугъунрин, кIвалин къаб-къажахдин тIварар чир жезва. Им, дугъриданни, несилриз лап герек чирвилер гузвай ирс я.

Мерд Али