Мегьарамдхуьруьн райондин Самур патан хуьрер, кьилди къачуртIа, Билбилхуьруьн-Къазмаяр, Самур, Азадогъли, Тагьирхуьруьн-Къазмаяр Самурдин тамун юкьва авай гуьзел ва берекатлу маканрикай я.
Са патахъай гьуьл, муькуь патахъай кьакьан там гала. Хъуьтуьл чими гьава ава. ЧIулав накьвадин чил берекатлуди, гатфар ва гад, гьатта къизилдин рангар акьалтнавай зулни гьейранардайди я. Арандин чилерин адетдин емишрин вахт акьалтIайдалай кьулухъ агьалийрин саларани багълара ажайиб набататрин — кивидин, хурмадин бегьер агакьзава.
Октябрдин вацра, марфарилай гуьгъуьниз салара булдаказ къарникъузар пайда жеда. Абур кIватIун патал тамуз фин герек къвезвач. Бязи мерейри — малинади, некьийри — кьвед лагьай сеферда бегьер гъизва. Ина гьакIни розмарин, лаванда, мелисса хъчар, гьатта кьибледин уьлквейриз хас пальмаярни, лаврдин тарарни адетдин набататриз элкъвенва. ХупI гуьзел тушни Самур патан зул!
«Лезги газет»
