Вучиз ятIани, гъилевай йисуз Федеральный СМИ-ри уьлкведин бязи регионра хулиганвилер ийизвай кавказвийрикай галаз-галаз хабарар гузва. Гьа са вахтунда викIегь, масадбуру чешне къачудай крар ийизвайбурукай кхьизвач. Авайвал лагьайтIа, Кавказдин халкьарин векилрин арада къени, баркаллу крар ийизвайбур гзаф я.
Ингье и йикъара “Калининград” ГТРК-ди и областдин Балтийск шегьерда цIай кьур кьакьан кIвалерай инсанар къутармишиз куьмек гайи кьве дагъустанвидикай ихтилатна. Газ себеб яз, кIвалерин сад лагьай мертебади цIай кьуна. Адан къативал ахьтинди тир хьи, са тIимил вахтундилай цIай вини мертебайривни агакьна. Эгер и дуьшуьшдин шагьидар хьайи бязибур, телефондин трубкаяр акъудна, видеосъемкаяр авунал машгъул хьанатIа, гьуьлуьн флотдин частара къуллугъзавай кьве жегьил цIай кьунвай кIвалера авайбуруз куьмек гуз фена. Абур Ражаб Ризвановни Пирмегьамед Гьуьсейнов тир.
Ризванова, кузвай кIвализ дакIардай фена, дишегьлини адан гъвечIи аял къутармишна. Ахпа ада кьвед лагьай мертебада авайбуруз куьмекиз гьерекатна. Идалай гуьгъуьниз викIегь морякри пуд лагьай мертебадин кIвале авай, гьеле ксанмай кьуьзуь къари гъилераллаз къецел акъудна. Санлай къачурла, абуру 7 кас къутармишна!
Идаз ухшар маса дуьшуьш Санкт-Петербург шегьердани хьана. Дагъустанви жегьилди гъвечIи аялни галай дишегьлидал пул къакъудунин мураддалди гьужумнавай кьуд алчах чукурна. Ахпа малум хьайивал, дишегьлиди вичин кIвалин къайгъуяр авун патал банкдай пул къачунвай. Идакай малум хьайи къачагъар адан гуьгъуьна гьатна. Дишегьлиди вич алчахрикай къутармишай дагъустанвидиз рикIин сидкьидай сагърай лагьана.
Абад Азадов
