Дагъларин уьлкведин шегьеррани хуьрера спортдал машгъул жезвай, хайи республикада ва адалай къецени кьиле физвай спортдин акъажунра хъсан нетижаяр къазанмишзавай, идалди чпин хайи ерияр машгьурзавай кьегьалрикай, абурун агалкьунрикай чна гьар са нумрада газет кIелзавайбур хабардарзава. И макъалада заз Мегьарамдхуьруьн райондин Гъепцегьрин хуьре яшамиш жезвай, еке агалкьунар авай спортсмен, тежрибалу тренер Эйнар Кавказович Экберовахъ галаз танишариз кIанзава. Адан гъилик вердишвилер къачузвай аялрин алакьунрикай чна са шумудра газетда чап авурди я.
Мукьвара Санкт-Петербургда грэпплингдай ва джиу-джитсудай кьиле фейи дуьньядин чемпионатда Эйнар Экберова 66 кг-дилай артух заланвал авайбурун арада спортдин кьве жуьредайни чемпионвилин тIварар къазанмишна. Им адан сад лагьай агалкьун туш. 2004-йисалай Э.Экберова джиу-джитсудай ва грэпплингдай вичин къуватар ахтармишзава. Гила адакай спортдин и жуьрейрай дуьньядин 4 сеферда чемпион хьанва… Мадни джиу-джитсудай ва грэпплингдай кьиле фейи дуьньядин чемпионатра кьве сеферда ада гимишдин медалар къазанмишна. Кьве сеферда адакай Евразиядин чемпион хьана. 8 сеферда ада дуьньядин кубокар къазанмишна. Ам джиу-джитсудай чемпионвилин 13 чIулунин сагьиб я. 2019-йисуз чи ватандаш, дуьньядин кесерлу майданра къазанмишнавай агалкьунриз килигна, “Йисан виридалайни хъсан спортсмен” яз гьисабнай. Алай вахтунда Э.Экберовахъ мичIи яру рангунин чIул ава. Ам международный классдин спортдин мастер я. Республикадин, международный, Россиядин акъажунра ада лап гзаф шабагьар къазанмишнава. Абур гьар сад еке зегьметдин нетижа я…
Э.Экберов 1987-йисуз Гъепцегьрин хуьре дидедиз хьана. Ана мектеб акьалтIарна, 2012-йисуз ам Санкт-Петербургдин МЧС-дин университетдик экечIна, “Психолог-спасатель” пеше къачуна. Мектебда 6-классда кIелзавай вахтунилай Эйнар спортдал машгъул жезва. Сифтедай ада Азербайжандай тир тренер Бег Меликован гъилик дзюдодин сирер чирна. Ахпа Бут-Къазмайрал Омар Шагьмарданован ва Махачкъалада Эльмир Алибегован гъилик устадвал хкажна. Эйнар дзюдай спортдин мастервилин, чIулав чIулунин сагьиб я. Гуьгъуьнлай ам джиу-джитсудал ва грэпплингдал элячIна. Спортдин амай жуьрейрилай тафаватлу яз, и жуьрейра тIарвал гудай къайдаяр ишлемишуналди бягьс фад акьалтIардай мумкинвал аваз хьуналди адаз абур хуш хьана.
Эйнар Кавказович спортдив рикI гваз эгечIзавай кас тирди адахъ галаз суьгьбетиз эгечIай сифтегьан декьикьайра ашкара жеда. Ихьтин ксариз Аллагьди и рекьяй пай ганвайбур лугьуда. Белки, чIехи бубайрал атанва жеди ам. ГьикI хьи, дидедин (Нагъиева Шафига — ам муаллим я) патай чIехи буба Нагъиев Межид виридаз викIегь спортсмен ва хъсан музыкант яз чида. Халуйринни спортдал рикI алай. Буба, Кавказ Экберов, чаз малум тирвал, футболдай яргъал йисара Гъепцегьрин хкянавай командадин капитан тир.
Россиядин шегьерра кIвалахна, хайи ерийриз хтайдалай кьулухъ Эйнара тренервиле зегьмет чIугвазва. И рекьяй ада алатай йисуз махсус курсарни акьалтIарна. Алай вахтунда чи ватандашдин гъилик 100-далай виниз жаванри (Усуррин, ЦIийи Гъепцегьрин ва КьепIир-Къазмайрин хуьрерай) чпин уствадвал хкажзава. Тренервилин рекьени адахъ еке агалкьунар авайди адан гъилик тербия ва вердишвилер къачузвай аялрин гьунарри субутзава.
Винидихъ къейднавайвал, Санкт-Петербургда кьиле фейи дуьньядин чемпионатда Э.Экберован гъилик вердишвилер къачузвай жаванрини иштиракна. ИкI, са шумуд гьафте вилик чна вичикай газетда кхьей Ренат Гьажибегов (50 кг) 2008-2009-йисара дидедиз хьайи жаванрин арада 1-чкадиз лайихлу хьана. Яшар 18-далай виниз тир жаванрин арада Арсен Агьмедова (92 кг-дилай гзаф) — 2 ва 2008-2009-йисара дидедиз хьанвай жаванрин арадани Мугьаммед Шабанова (60 кг) 3-чкаяр кьуна.
Эйнар Кавказовичан гъилик вердишвилер къачузвай жаванрикай икьван чIавалди хъсан нетижаяр къазанмишай спортсменрин сиягь лап екеди я. Къуй абурун кьадар мадни артух хьурай! Абурун жергеда Букаров Рамазан, Шагьбанов Сардар, Шагьбанов Саад, Шагьбанов Мегьамед, Нурагьмедов Къурбан, Нагъиев Амир, Канбутаев Фарид, Нуьдуьров Ислам, Пиров Имам, Агъарагьимов Салаудин, Рустамов Рустам, Шагьбанов Муса, Нурагьмедов Ренат, Костоглод Илья, Каримов Исламудин ва масабур ава.
Эйнар стха, къуй квехъ ва куь гъилик устадвал хкажзавай жаванрихъ мягькем сагъламвал, гележегда мадни еке агалкьунар хьурай!
Рагнеда Рамалданова
