«Лезги газетдин» редакцияди малумарай «Лезги газет» — гьар са кIвализ» серенжем давам жезва. Къе адак ФЛНКА-дин президент, миллетрин арада авай алакъайрин рекьяй Урусатдин Президентдин патав гвай Советдин член Ариф Пашаевич Керимова вичин пай кутуна: 2022-йис патал «Лезги газет» кхьин патал ада редакциядиз 50 агъзур манат пул чара авунва.

Идахъ галаз сад хьиз, Ариф Керимова «Лезги чIалал ктабар» проектдин сергьятра аваз, газетдин кьилин редактор Мегьамед Ибрагьимовани адан заместитель Куругъли Ферзалиева акъуднавай «100 тапшуругъ» ктабдин 250 экземпляр маса къачуна. И кардизни чи халкьдин кьегьал хци 50 агъзур манат пул харжна.

Лагьана кIанда, Ариф Керимова «Лезги газетдин» редакциядин дегьлиз (коридор) цIийикIа туьхкIуьр хъувуниз акъатзавай харжарни вичин хивез къачуна. Адан къаюмвилик квай «Национальное возрождение» тIвар алай фондуни (фондунин президент Ариф Керимован хва Токай Керимов я) и макьсадриз 900 агъзур манат пул чара авуна. Къе-пака редакция авай 7-гьавадин дегьлизда цIийикIа туьхкIуьр хъувунин кIвалахар акьалтIардайвал я.

Хайи чIалал акъатзавай газетдин кIвалах вилик финик лайихлу пай кутунай, редколлегиядин къарардалди, Ариф Пашаевич Керимоваз редакциядин патай уьмуьрлух «Лезги газет» кхьенва.

«Лезги газетдин» редакциядин коллективди Ариф Керимоваз милли газетдин тираж артух хьуник вичин пай кутунай сагърай лугьузва.

Къейд ийин хьи, «Лезги газет» — гьар са кIвализ» серенжем декабрдин эхирдал кьван давам жеда. Адак пай кутаз кIанзавай ватанэгьлийривай 8-928-584-16-72 нумрадин куьмекдалди редакциядихъ галаз алакъадиз экъечIиз жеда.

«Лезги газет»