Алатай гьафтеда “Лезги газетдин” редакциядин конференц-залда лезги алимрихъ, жемиятдин векилрихъ галаз гуьруьш кьиле фена. Ана газетдин кьилин редактор Мегьамед Ибрагьимова, Дагъустандин агъсакъалрин Советдин член Гьасен Балатова, Махачкъала шегьердин ветеранрин Советдин председатель Шамил Асланова, ДГУ-дин профессор, философ Омар Гьуьсейнова, ДГПУ-дин профессор Шайдабег Мирзоева, жемиятдин векилар тир Алпан Агъабалаева, Сиражудин Къазибегова, диндин деятель Сулейман Тагъибегова ва газетдин кьилин редактордин заместитель Куругъли Ферзалиева иштиракна.
Гуьруьшдал Мегьамед Ибрагьимова къейд авурвал, республикада гзаф идарайра, гьа гьисабдай яз, са жерге газетринни журналрин редакцийра, общественный советар кардик ква. “Лезги газетдин” редакциядани ихьтин совет арадал гъидай фикир ава. И месэладин гьакъиндай редакциядин мугьманрини чпин фикирар лагьана. Абурун гафарай малум хьайивал, общественный совет арадал гъунихъ гьам газет, гьамни вири халкь патал хийир ава. Абуру гьакIни советдик эдебиятдин, искусстводин, сиясатдин векилрикайни са-са кас кухтунин теклиф гана.
Гуьгъуьнлай иштиракчийри советдин председатель яз Омар Гьуьсейнов хкяна. Нубатдин гуьруьш декабрдин вацра тухудайвал я. А чIавуз Общественный советдин состав тестикьарда ва адан макьсадарни везифаяр тайинарда.
Чи мухбир
