Тапшуругъ гана
Россиядин премьер-министр М.Мишустина регионрин губернаторриз коронавирусдиз акси вакцинациядин еришар чпин хсуси гуьзчивилик кутунин тапшуругъ гана, хабар гузва “Новости” РИА-ди.
Адан фикирдалди, регионрин кьиле акъвазнавайбуру тIугъ-валдихъ галаз тухузвай женг кьетIен гуьзчивилик кутун ва рапар ягъунин гьерекатар йигинарун лазим я. Регьберри тIугъвалдин гьалар дикъетдикай хкуд тавун ва чарасуз тир серенжемрал амал авун таъминарна кIанзава.
“Азарханайра, поликлиникайра вири дарманар хьун герек я. Агьалияр сагъарунин ва медицинадин рекьяй гузвай куьмекдин ери гьа идалай аслу я”, — лагьана премьер-министрди.
Телефондай рахана
Россиядинни Франциядин регьберри, телефондай рахуналди, Польшадинни Белоруссиядин сергьятдал арадал атанвай кьетIен гьалар веревирдна. Идакай “Интерфакс” чешмеди хабар гузва.
В.Путин ва Э.Макрон сергьятдал арадал атанвай гьалар пайгардик кухтунин патахъай саналди алахъунар авунин фикирдал атана.
Ковиддилай кьулухъ…
Пегьризчи Михаил Гинзбурга ковиддик начагъ хьайидалай кьулухъ сагъламвал гуьнгуьна хтунин карда менфятлу няметрин тIварар кьунва. Адан фикирдалди, D витамин квай суьрсетри хъсандиз куьмек гуда. Пешекардин гафар “Народные новости” чешмеди раижнава.
“Сифте нубатда D витаминдалди балугъар девлетлу я, месела, скумбрия ва сельдь. ГьакIни хамзарар, мереяр, брусника хийирлу я”, — гъавурда туна пешекарди.
Къейдзавайвал, недай затIарик фу, чIахар, хвехвер ва некIедин цуру суьрсетар хьун лазим я.
QR-кодар — чарасуз серенжем
Госдумади регионриз QR-кодрин чарасузвилин гьакъиндай проект ракъурда. Россиядин регионриз, общественный палатадиз, счетный палатадиз ва Федерациядин Советдиз 14-декабрдалди рекье твадайвал я. Идакай Госдумадин Председатель В.Володина вичин Telegram-каналда кхьена.
Тестикьарзавайвал, сифте нубатда кьилдин законопроектдалди санитариядизни эпидемиологиядиз талукь Федеральный къанундик дегишвилер кухтун теклифзава. Кьвед лагьай документди ракьун рекьин ва авиациядин улакьра коронавирусдиз акси раб янавайвилин гьакъиндай шагьидвалзавай QR-кодар ишлемишунин къайда тайинарда. Володинан гафаралди, исполнительный гьукумдин органриз, жемиятдиз ва карчийриз, гьакI маса ксаризни проект дикъетлудаказ ахтармишдай, чпин къейдер ва теклифар лугьудай мумкинвал жеда.
Куьмек гуда
Россиядин Президент Владимир Путина Донецкдин ва Луганскдин областрин кьилдин районрин агьалийриз, анра экономикадин ва ковиддин жигьетдай гьалар писзавайвиляй, гуманитарный куьмек гунин гьакъиндай къарардал къул чIугуна. Документ правовой информациядин интернет-порталда чапнава.
Адал асаслу яз, Донецкдин ва Луганскдин халкьарин республикайрив куьмек агакьда. Къейдзавайвал, къарар та Донбассда сиясатдин гьалар пайгардик ахкатдалди, Минскдин икьраррин бинедаллаз, къуватда жеда.
Аксивилер давамарзава
Евросоюздин Советди санкцийрин сиягьдиз Сириядин кьуд министр алава хъувуна. Идакай ЕС-дин Советдин сайтда малумарнава.
“16-ноябрдиз Советди Сирияда цIийиз тайинарнавай кьуд министр кьилдин ксарин ва тешкилатрин санкцийрин сиягьдик кухтунин къарар кьабулна”, — лагьанва малуматда. Къейдзавайвал, сергьят эцигнавай серенжемар цIийи хъувун Сириядин гьаларихъ галаз алакъалу я. ИкI, алай вахтунда ЕС-дин чIулав сиягьда Сириядин 287 ватандаш ва 70 тешкилат ава.
Мад цIийи санкцияр
Вашингтонди, Украина себеб яз, Россиядиз акси цIийи санкцияр кардик кутуникай фикирзава. Идакай “Bloomberg” чешмеди хабар гана.
Къейдзавайвал, гуя Россияди Украинадиз акси гьерекатар авуртIа кардик кутада лугьуз, Америкадин сиясатчийри Евросоюздин уьлквейрин гьукумдаррихъ галаз санал цIийи санкцияр туькIуьрнава ва исятда абур веревирдзава. Идалайни гъейри, США-ди Киевдиз военный рекьяй мад алава куьмекун тешкилдайвал я.
Цацар алай симиналди
Эстониядин гьукуматди Россиядихъ галаз авай сергьят цацар алай симиналди мягькемарунин теклиф ганва, хабар гузва “Новости” РИА-ди.
Эстониядин премьер-министрди къейдзавайвал, Польшадихъ, Литвадихъ, Латвиядихъ галаз авай сергьятрал арадал атанвай гьалар зарафатдинбур туш. Ада уьлкведин хатасузвилин рекьяй кардик квай комиссияди ганвай теклиф хъсанди яз гьисабзава.
«Лезги газет»
