РФ-дин Общественный палатади малумарнавай “Зи проект — зи уьлкведиз!” яшайишдин важиблувал авай проектрин конкурсда, “Медицина ва здравоохранение” номинациядай финалдиз “Сагълам хуьр” проектдин автор, чи ватандаш духтур-уролог, алай вахтунда Москва шегьердин 115-нумрадин поликлиникада зегьмет чIугвазвай Загьир Агъамов акъатнава. Идакай “Лезги газетдиз” проектдин пресс-къуллугъдай хабар гана.
Малуматда къейднавайвал, РФ-дин саки вири субъектрай конкурсдиз рекье тунвай 2 500 проектдикай яшайишдин рекьяй важиблубур яз 39 проект хкяна. Абурукай финалдиз пуд, гьа гьисабдай яз Загьир Агъамован “Сагълам хуьр” проект акъатна.
РикIел хкин: “Сагълам хуьр” проект 2020-йисан гатуз кардик акатна. Алатнавай вахтунда адан авторди федеральный медцентрайрин кар алай къуллугъчияр Дагъустандин яргъал районриз махсус 5 финиф тешкилна.
“Духтуррин дестеяр гьар кткайвал тешкилзавач. Тайин са райондиз фин патал гьазурвилер аквадайла, виликамаз ана гьи хиляй духтуррин игьтияж аватIа чирзава. И жигьетдай малумат агакьайла, духтуррин десте кIватIунив эгечIзава. Чна тешкилай финифрин нетижада хуьрера яшамиш жезвай 3 агъзурдалай виниз агьалийриз чпин сагъламвал ахтармишдай ва духтурривай меслятар къачудай мумкинвал хьана. Чпихъ са гьихьтин ятIани начагъвилер авайди тестикь хьайи ксарин сагъламвал мадни дериндай ахтармишун патал абур гьар са азардиз талукь хиляй медицинадин идарайриз рекье твазвай (пулсуздаказ), — кхьенва малуматда”.
З.Агъамов Мегьарамдхуьруьн райондин Хъартасрилай я.
«Лезги газет»
