РД-дин Кьилин патав гвай регион стратегиядин жигьетдай вилик финин ва проектрин кIвалахдиз талукь Советдин заседание Сергей Меликован регьбервилик кваз 9-ноябрдиз Дербент шегьерда кьиле фена. Анал веревирд авур месэлайрикай сад “Дербент шегьер” муниципальный тешкилатдин шегьердин округ комплекснидаказ вилик тухун” госпрограмма уьмуьрдиз кечирмишзавай гьалдиз талукьарнавай.
Региондин руководителди рикIел хкайвал, РФ-дин Гьукуматдин Председатель Михаил Мишустинан тапшуругъдалди 2021-йисан 11-октябрдиз РФ-дин гьукуматдин “Дербент шегьер” 2025-йисалди вилик тухунин комплексный план” тайинарнавай.
Шегьердин администрацияди къенин йикъалди и рекьяй авунвай кIвалахар къейд авуналди, Сергей Меликова вичин фикир алай вахтунда Дербент шегьерда кьиле тухузвай важиблу эцигунрикай сад тир ятар михьи ийидай имаратдал желбна. Ихьтин имарат шегьерда тахьуни адаз экологиядин жигьетдай зиян гузва. Гьа са вахтунда шегьердиз инвестицияр гъунин кардизни манийвалзава. Дербент шегьер целди таъминарзавай системаярни цIийи хъийидай гьалда ава. “Южный” микрорайонни комплексный къайдада вилик тухун патал ина хейлин объектар эцигна кIанзава.
Республикадин Кьили “Ватанперес” парк туькIуьрунин месэла хъсанди яз гьисабна. Гьа са вахтунда ада талукь министерствойриз паркуна вири къайдайрихъ галаз кьадайвал ТИР тадакраламишунин, “Гонка Героев” жуьредин акъажунар кьиле тухудай майдан къайдадиз гъунин тапшуругъ гана. С. Меликова къейд авурвал, эцигзавай гьар са объектдал ва тамамарзавай кIвалахрал, харжзавай финансрал кIеви гуьзчивал тухвана кIанда.
Госпрограмма уьмуьрдиз кечирмишзавай гьалдикай шегьердин мэр Рустамбег Пирмегьамедова суьгьбетна. Ада къейд авурвал, 2019 -2020-йисара шегьерда эцигунрин, коммунальный, социальный ва транспортдин хилерин имаратар цIийи хъувунин ва капитальнидаказ ремонт авунин кIвалахар хъсандаказ кьилиз акъудна. Кьилди къачуртIа, 140 чка авай аялрин бахча ишлемишиз вахкана. Аялрин 8 бахча, 4 школа капитальнидаказ ремонтна ва анагар цIийи мебелдалди тадаракламишна. 10 школадин къугъунардай майданар къайдадиз гъана. Мамедбегован куьче аваданламишна. Алай вахтунда анаг шегьерэгьлийрин ва мугьманрин рикI алай чкадиз элкъвенва.
Дагъустан Республикадин госпрограммадин сергьятра аваз общественный 10 майдан комплекснидаказ аваданламишуниз, модулдин вад къазанхана эцигуниз, чимивилин хейлин сетар ремонт авуниз, спортдин дворец, гуьзчивиликай хкатнавай гьайванрин приют эцигуниз, аялрин 4 бахчадин ва 8 школадин дараматар капитальнидаказ ремонт авуниз, Азербайжанрин театрдин дарамат цIийи хъувуниз талукь кIвалахар кьиле тухузва. Гъилевай йисуз 5 миллиард манатдин къимет авай кIвалахар куьтягьда.
Пирмегьамедова малумарайвал, алай йисуз “Южный” микрорайонда эцигунриз талукь инвестициядин чIехи проект уьмуьрдиз кечирмишиз гъиле кьунва. И райондин кар алай чка жуьреба-жуьре динриз талукь центр жеда. “Алай вахтунда диндин центрадин проект туькIуьруниз талукь международный конкурс тухун патал контракт туькIуьрнава. Къведай йисуз проектдинни сметадин документар гьазурда”, — хабар гана шегьердин администрациядин кьили.
Идалайни гъейри, шегьердин “Аваин” микрорайондин мулкарни комплекснидаказ вилик тухуниз талукь серенжемар гъиле кьазва.
Дербент шегьер 2025-йисалди комплекснидаказ вилик тухунин госпрограмма кьилиз акъудзавай гьалдикай РД-дин экономикадин министрдин везифаяр вахтуналди тамамарзавай Руслан Алиева малумат гана. Адан гафаралди, программа кьве патал пайнава. Сифте пай проект финансламишунихъ галаз ва кьвед лагьай пайни гележегдин проектрихъ галаз алакъалу я. И госпрограммадин 1-пай тамамаруниз 5,7 миллиард манат пул чара ийидайвал я. 4.5 миллиард манат федеральный бюджетдай, 192,6 миллион манат республикадин бюджетдай, са миллиард манатни бюджетдинди тушир чешмейрай. Госпрограммадин кьвед лагьай пай патал 177,5 миллиард манат чара ийизва. 42,2 миллиард манат федеральный бюджетдай, 7,3 миллиард манат республикадин бюджетдай ва 127,9 миллиард бюджетдинди тушир чешмейрай.
Эхирдай Сергей Меликова Дербент вилик тухуниз талукь госпрограммаяр кьилиз акъудунин кардик республикадин эменнидин, образованидин ва здравоохраненидин министерствойрини чпин пай кутуна кIанзавайдакай лагьана.
“Чахъ къе шегьерда аялрин кьве бахча ва школа эцигдай мумкинвал ава. Эгер чна алай аямдин микрорайон арадал гъизватIа, ана эцигдай здравоохраненидин идараяр алай аямдин тадаракралди таъминарна кIанда. Им лап чIехи проект я. Инвестор герек кьадар пуларни чара ийиз гьазур я. Гьавиляй чна гележегда гьар са касди дамахдай хьтин имаратарни эцигна кIанда”,- лагьана эхирдай Сергей Меликова.
Госпрограмма уьмуьрдиз кечирмишунин куратор яз РД-дин Гьукуматдин Председатель Абдулпатагь Амирханов тайинарна.
«Лезги газет»
