18-ноябрдиз Махачкъалада, Урусрин театрдин чIехи залда, РФ-дин искусствойрин лайихлу деятель, государстводин премийрин лауреат, СССР-дин композиторрин Союздин член Мегьамед Гьуьсейнован 80 йисан юбилейдиз талукьарнавай межлис кьиле фида. Мярекатдин тешкилатчияр РД-дин культурадин министерство ва Дагъустандин операдинни балетдин гостеатр я.
Мегьамед Гьуьсейнов Дагъларин уьлкведин меденият вилик финик кьетIен пай кутур устадрин жергеда ава. Адан яратмишунри Урусатдин ва Дагъустандин руьгьдин ирсинин хазинада лайихлу чка кьунва. Юбилейдиз талукьарнавай мярекат республикадин музыкадин “Панорама музыки дагестанских композиторов” лишандик кваз тешкилзавай пуд лагьай фестивалдин сергьятра аваз кьиле фида. Межлис нянин сятдин 6-даз гатIунда. Ана иштиракиз кIанзавайбурув коронавирусдиз акси раб янавайди тестикьарзавай QR-код хьун шартI я.
«Лезги газет»
