— Диде 4-мертебада къатканва. Ада кIвалахзавай цехда авай вири дишегьлияр — са шумуд кас санлай  азарлу хьана. Сифтедай им уьгьуьяр акатуниз ухшар тир, ахпа бедендал ифин акьалтна. Адан зайифвал акурла, чна ам КТ авун патал поликлиникадиз тухун кьетIна, жигеррин 5-10 %  харапI хьанвайди малум хьана. Диде гьасятда азарханадиз тухвана. Амма тIегъуьнди жигерриз гузвай зиян яваш жезвачир. Къе адаз “Актемра” дармандин капельница кутунва, — рикI дарих яз руша, зун куьсридал ацукьайди акурла, суьгьбет башламишнай.

Патав жуван дердинихъ яб акалдай кас хьунни тIимил важиблу туш. За рушаз сабурар гана, Ал­лагь­дикай умуд атIун тавун тIа­лаб­на…  КIвализ хъфинин теклифдихъ га­­лаз ам рази хьана. Къарагъна чун кьведни остановка галайвал рекье гьатна. За адавай телефондин нумрани къачуна.  Пакадин юкъуз зал ам мад гьалтна, ам гьа куьсридал ацукь­навай. Эмилия тир рушан тIвар, адан гафарай, дидедин гьал пис хьанвай, ам реанимацияда авай… Кьве юкъуз заз мад а руш ах­кунач. Зенг авурла, ада жаваб га­нач. Зи ри­кIяй жуьреба-жуьре хиялар физ­вай…­ Амма реанимациядиз аватай адан диде, мад анай ах­къатнач.

“Виридалайни агъур­ кар багъри касди текдиз чан гун я”, — ла­­гьа­най ада са шумуд йикъалай вичи зенг авуна чун рахай чIавуз.