Са тIимил вахт идалай вилик зал кIвалахдин рекьяй юлдаш руш гьалтна. Чун фадлай акунвачир. Жузунар-качузунар авурдалай кьулухъ, за адавай кьилел чIулав яйлух вучиз алукIнаватIа хабар кьуна. “Буба амач. Ковид”, — куьрелди жаваб гана ада, ахпани суьгьбетдив эгечIна:
— За алай йисан гьеле мартдиз ковиддиз акси раб ягъайди я. Идахъ кьве себеб авай. Сад лагьайди, зун хаталувилерихъай кичIе инсан туш. Кьвед лагьайдини, заз чидайбурукай азар акатна кьейи ксарни гзаф авай. Азардиз акси раб ягъуникай кичIезвайбуруз заз къалуриз кIанзавай:
“Ингье зун, сагъ ва саламат я. Гьар арбе юкъуз прямой эфирдиз экъечIзавай зун, гьамиша виридан вилик квай кас я эхир”. Заз зи багърийрини вирида азардиз акси рапар яна кIанзавай. Амма буба чIалал гъиз хьанач:
“Я чан руш, зи яшара аваз ажалдикай кичIе жедани?”, — лугьуз хьана ам.
Ковид акатна, жигерриз анжах 5 % зиян хьанвай адан, амма бедендин ифин 40 градусдилай алатзавачир. Ам Махачкъаладин “ветеранрин госпиталда” къаткурна. Ина лагьайтIа, чIехи пай Каспийскдин медучилище акьалтIарнавайбур я. Бубади саки 20 йисуз ана тарсар гайиди я, виликан вичин ученикар вичихъ хъсан гелкъвезва лугьуз ам гзаф шад тир. Ада еке дамахдивди гьар са медсестрадикай, духтурдикай заз суьгьбетарзавай, “вацапда” зарафатар квай СМС-ар ракъурзавай. Амма садлагьана адан гьал пис хьана, реанимациядиз аватна, денбеден куьтягь хьана. За Аллагьдиз шукур хьурай! — лугьузва, — адаз яргъалди азаб ганач, вичин хцин гъилел ада чан гана, ИВЛ-дин “зиллет” адаз акунач. Зи стхади духтуррихъ яб акалнач, вичик антитела квайдакай даях кьуналди, ам бубадихъ гелкъуьн патал “Яру зонадиз” фенвай.
