Дагъустан Республикадин Мегьарамдхуьруьн, Ахцегь, Докъузпара ва Дербент районрин мулкарал алай Самурдин тама и йикъара Вирироссиядин “Чил зирзибилдикай михьи ийин” серенжем кьиле фена.
Серенжемда РД-дин образованидин ва илимдин министерстводик акатзавай алава образованидин “Илимдин гъвечIи академия” ГБУ-дин муаллимри ва методистри, Мегьарамдхуьруьн райондин Тагьирхуьруьн-Къазмайрин юкьван мектебдин 7-классда кIелзавай аялри, милли паркунин государстводин инспекторри ва государстводин “Дагъустандин” заповедникдин экологиядин рекьяй савадлу авунин отделдин къуллугъчийри иштиракна.
Серенжемдин иштиракчийри чкадин агьалийри ва туристри ял ягъун патал рикI алаз ишлемишзавай участок зирзибилдикай михьна. Инай 150-дав агакьна шешелра авай яшайишдин амукьаяр кIватIна ва лазим чкадиз рекье туна. “Пластикдин путулкаяр, консервийрин кьватияр, тIебии жуьреда терг тежезвай маса жуьре хейлин зирзибил ина кIватI хьана сад-кьве йис тушир, гьаниз килигна, чун и участок виликан, яни михьи къайдадиз хкиз хьунал шад я”, — лугьузва Тагьирхуьруьн-Къазмайрин мектебда кIелзавай аялри.
Серенжем кьиле тухузвай вахтунда Экостанциядин руководитель Заира Гьажиевади тамун экологиядин месэладин гегьеншвилел аялрин фикир желбна, ам гьялун патал жемиятдин гегьенш къатарин фикирни желбна кIанзавайдакай лагьана. Ада аялриз Дагъустандин экологиядин хци месэлайрикай элкъвена кьунвай тIебиат ахтармишунин рекье республикадин дережада аваз гьар йисуз кьиле тухузвай мярекатра, серенжемра суьгьбетар авуниз эвер гана.
Серенжем РД-дин МАН-дин Ресурсрин центрадин муаллим-организатор Зуьгьре Гьажиевади кьиле тухвай тренингдалди акьалтIарна. Вири иштиракчийриз государстводин “Дагъустандин” заповедникдин патай рикIел аламукьдай пишкешар гана.
«Лезги газет»
