Квез чидани?
— Италиядин мулкарал кьве гъвечIи гьукумат ала: Сан-Марино ва Ватикан.
— Европада виридалайни гзаф Италиядин мулкарал янардагъар (вулкан) ала.
— И уьлкведихъ чпин кьилдин нугъатар, адетар авай 20 область ава. Областар коммунайриз пайнава, абурун кьадар 8 агъзурдалайни гзаф я.
— Италияда ЮНЕСКО-дин ирсиник акатзавай 50-далай виниз памятникар ава. Маса уьлквейра икьван авач.
— Италия пуд терефдихъай гьуьлери кьунва.
— Италияда 1088-йисалай инихъ кардик квай Болонский университет Европада виридалайни къадимди яз гьисабзава.
— Дуьньяда машгьур пицца Италиядин кухнядик акатзава. И уьлкведин агьалийри гьазурзавай пиццайрин жуьреяр 2 агъзурдалайни алатнава.
— Италияда йифен сятдин садалай экуьнин вадалди пляждал фин къадагъа я — 150 евродин жерме ийизва.
— Адет яз, и уьлкведа жегьилар 30 йис тамам хьайидалай кьулухъ эвленмиш жезва.
— Италияда етимханаяр авач. Аялрал и уьлкведин ватандашрин пара рикI ала.
— Къадим тарих аватIани, битав уьлкве яз Италия 1861-йисуз арадал атана.
— Архитектурадин къайда чIур тавун патал Италияда къуншийрихъ са жуьредин дакIарар хьун лазим я.
— Рим дуьньяда виридалайни къадим шегьеррикай сад яз гьисабзава. Ам чи девирдал къведалди хьайи 753-йисуз арадал атана.
«Лезги газет»
