Шагьадатнама дегишарун
Водителвилин шагьадатнама МФЦ-дин идарада дегишариз жеда. Адет яз, ишлемишунин вахт алатай, документдиз зарар хьайи, квахьай ва я чуьнуьхай дуьшуьшра цIийи шагьадатнама вахчузва.
МФЦ-дай са четинвални авачиз цIийиди вахчуз жеда. Ихьтин документар герек я:
— куьгьне шагьадатнама (амаз хьайитIа);
— паспорт;
— медицинадин справка.
Шагьадатнама вахчузвай касди 2 агъзур манатдин кьадарда госпошлина гун герек я. И къуллугъ 15 йикъан къене кьилиз акъудда.
Эменни тIимил тир хизанриз
Эменни тIимил авайбур яз тестикьарнавай хизанриз гьукуматдин патай са жерге кьезилвилер талукь жезва:
— 3-7 йисан яшара авай аялриз пособияр;
— яшайишдин коммунальный къуллугърай гузвай гьакъидин субсидия;
— налогрин кьезилвал;
— студентриз яшайишдин стипендия;
— регионда тестикьарзавай пулдин такьатар (месела, 1-классдиз физвай аялдиз гузвай 2 агъзур манат).
Малум тирвал, гьар са касдал яшамиш хьунин такьатрин агъа кIанин кьадардилай тIимил гьалтзавай хизанар эменни тIимил авайбурук акатзава.
Багъманчийриз
“Дагълух мулкар еримлу авун” программадин сергьятра аваз хуьруьн майишатдин багъманчивилин хилел машгъулбурувай, конкурсдин бинедаллаз, гьукуматдин патай куьмек яз 400 агъзур манатдин кьадарда пулдин такьатар къачуз жеда. Идакай чаз РД-дин МФЦ-дин кьилин идаради хабар гана.
Къейдзавайвал, пулдин такьатар гьуьлуьн дережадилай 500 метрдин кьакьанда авай мулкара гзаф бегьер гудай цIийи багълар кутазвайбуруз талукь я. Кьилин шартI ам я хьи, багъманчи вичин хсуси майишат кьиле тухузвайди ва зур гектардал кьван чилин участок авайди хьун герек я.
Конкурсдиз арзаяр алай йисан 15-ноябрдалди кьабулзава. Программадин шартIарихъ галаз галай-галайвал РД-дин экономикадин ва мулкар вилик тухунин министерстводин сайтдин “Дагълух мулкар еримлу авун” разделда таниш жедай мумкинвал ава.
«Лезги газет»
