Чна тIуьниз дувул ишлемишзавай майвайрикай сад чугъундур я. Яру чугъундурар чигдаказни, рганани, чранани, кьелен цик кутунани ишлемишзава. Адакай хкудай мижени хъвазва.
Адак хийирлу витаминар, минеральный затIар гзаф ква. Пешекарри тестикьарзавайвал, рганвай къайдада ишлемишзавай чугъундурдикни менфят кумукьзава. Адак В, С, PP, Е, А, фолиевый кислота, кальций, магний, фосфор, калий, йод, цинг, марганец ква.
И майва инсандин сагъламвилиз чарасуз тир лизин, бетаин, аргинин, гистидин белокралдини девлетлу я. Ада ратар михьи ийида, инсульт хьунин хаталувал агъузарда, ивидин гьерекат къайдадик кутада, дамаррин давление агъузарда, хамунин гьал хъсанарда, кикер мягькемарда…
И майвадикай хкуднавай мижеди тумавар, туьтерин тIал алудуниз, токсинар хкудуниз, дуркIунринни лекьрен кIвалах, вилерин экв, чинин ранг хъсанариз, къванер акъудуниз куьмекзава.
Чугъундур кьадардилай артух ишлемишна виже къведач, иллаки чигдиз. Бязи чешмейри тестикьарзавайвал, хуквадин ва маса бязи азарар авайбуруз и майва ишлемишун къадагъа я. Гьавиляй гьар са рецепт гьазурунин, ам ишлемишунин жигьетдай гъавурда авай пешекаррин меслятрихъ яб акалун чарасуз я.
«Лезги газет»