Гьаваяр мекьи ва  чимивал гудай вахт мукьва хьуникди, яша­йишдин кIвалера­ни квартирайра пичер ва маса­ ала­тар иш­ле­мишуникди цIаяр кьунин жигьетдай хаталувал, адет яз, артух­ жезва. Гьаниз килигна Россиядин РД-да авай МЧС-дин Кьилин Управленидин Ма­хач­къа­ладин Ленинский райондин 2-нумрадин гуьзчивалдай ва цIаяр кьунин вилик пад кьунин кIва­лахрин  отделди (ОНД ва ПР) мукъаятвал квадар тавуниз эвер гузва.

Яшайишдин кIвалерани квартирайра чимивал гудай тадаракар, гьа гьисабдай яз гъили гьазурнавайбурни ишлемишунин нетижада электросетдал гуж ацалтзава ва проводка ифизва. Гуьгъуьнлайни, и карди цIай кьунал гъизва. Эгер куьне чимивал гудай тадаракар ишле­мишзаватIа, квез абу­рукай менфят къачунин ва абур эцигунин  къайдайрал амал ийизни чир хьун лазим я:

— электричестводин та­да­ра­кар анжах заводра акъуд­навайбур ишлемишна  кIанда;-ь абур цIай кьун мумкин тир затIаралди кIевна, абурал пек-партал кьурурна, патарив цIай кьадай шейэр эцигна виже къведач;

— куькIуьрнавай тадаракар датIана гуьзчивилик кутуна кIанда, кIваляй экъечIдайла, абур токдикай хкудун лазим я;

— электричестводин тадаракри гзаф ток ишлемишзавайди ва нетижада  проводкадал гуж ацалт­­завайди рикIе­лай ракъурна кIандач. Идахъ га­­лаз сад хьиз, эгер кIвале кайи ни гьатнаватIа, элект­ропроводка, розетка ифен­ва­тIа ва я абурун винел пад кана, чIу­лав хьанватIа, электросчётчикдин предохранителар датIана кузватIа ва абур хкат­заватIа — ибур кIва­лин (ва я квар­­ти­ра­дин) электросетдал гуж ацалтзавайвилин ва электричестводин тадаракар ишлемишун хаталу тирди тестикьарзавайвилин лишанар я. Абуруз фикир тагуни куь эменни ва кIвале яшамиш жезвайбурун уьмуьрни сагъламвал еке хаталувилик кутазва. ГьакI­ни, ми­хьи тавунвай гурмагъ, пичинин керпичра ва сувагъда хъиткьерар, патаривни фад цIай кьадай шейэр хьуни еке бедбахтвилел гъун мум­кин я.

Четин тушир са жерге къайдайрал амал авуналди, квевай кIвал цIай кьунин хаталувиликай хуьз жеда.  Ингье абур:

— чимивал гудай вахт баш­ламишдалди вилик и кар патал ишлемишзавай тадаракрин гьал ахтармишун ва, лазим аваз хьайитIа, абур ремонт авун;

— мукьвал-мукьвал гурмагъ бипIинрикай михьун;

— пичина кIарасрик цIай кутун патал бензин, нафт ва ихьтин маса затIар ишлемиш тавун;

— пичинин рак ачух­за­ва­тIа ва адан вилик кун тийидай чар (ам полдал михер яна ал­кIурнаваз хьун герек я) гвач­тIа, ана цIай тун тавун;

— пичинал гуьзчивал авун аялрал вегьин тавун;

— пичиниз мукьва чкадал кIарас, фад цIай кьадай ма­са затIар эциг тавун ва абур (пичер) гуьзчивиликай хкуд тавун.

Б.Гьажиев,

2-нумрадин ОНД ва ПР-дин къуллугъчи