Исятда зул я. Ам чна рикIерик гъалаба кваз гуьзлемишзавайди хьиз,  кечирмишни ийизва. Чи бубайри лугьуз хьайивал, зул  “цицIибар гьисабдай”, яни бегьер гъилиз къвезвай вахт я. Дугъриданни,  алай вахтунда инсанри чпин  багълара битмиш хьанвай яр-емишни салан майваяр худда кIватIзава.

Кьилди къачуртIа, чуьхверрин, ичерин, жумарин, по­мидоррин, истивутрин ва са жерге ма­са  набататрин бегьер вахчузва. Бязи емишрин екевили, дадуни, рангуни гьатта мягьтелар­зава. “Лимон”  сортунин чуьхверри — иллаки. Абурни жу­мар сад-садавай чара ийиз жедач.  Еке (гьардай гьатта 1 килограмм къвезва), акъатай хъипи рангунин абурун дадни вижевайди я.  Ша, илиф, дадмиша дустар, емишрал рикI алайбур!

Райсудин  Набиев