Россиядин Пенсийрин фондунин (ПФР) Дагъустан Республикада авай отделенидин пресс-къуллугъди хабар гузвайвал, кIвачел залан хьайи эвел кьилера медицинадин идарада учётда акъвазай дишегьлийриз пул гун — им гьукуматди уьлкведин агьваллувал тIимил тир хизанриз куьмек гунин серенжем я. И пул РФ-дин мулкарал яшамиш жезвай, чеб кIвачел залан яз 12 гьафте жедалди учётда акъвазнавай дишегьлийриз, эгер хизанда авай гьар са касдал регионда агьалияр яшамиш хьун патал тайинарнавай агъа кIанин кьадардилай виниз тушиз доход агакьиз хьайитIа гузва…
Гьар вацра гузвай пособидин кьадарди регионда зегьметдиз къабил агьалияр яшамиш хьун патал тайинарнавай кьадардин 50% тешкилзава. Малум тирвал, ам кIвачел залан хьайи 12- гьафтедилай аял хадалди гуда. Эгер учётда акъвазайдалай кьулухъ вацран къене арза гайитIа, пул кIвачел залан хьайи 6-гьафтедилай гуда, эгер арза геж гайитIа, пулни арза гайи вацралай чара ийида.
Пособие къачун патал “Госкъуллугъар” порталда электронный къайдадин ва я яшамиш жезвай чкадин Пенсийрин фондуниз фена арза кхьида. Анжах арза гун герек я, амай документар Пенсийрин фондуни вичи лазим органрай ва организацийрай къачуда. Эгер хизанда военныяр, къутармишдайбур, полициядин къуллугъчияр ва къуватдин амай къурулушра зегьмет чIугвазвайбур, кIелзавай ва илимдал машгъул жезвай идарадай стипендия, грантар къачунвай ксар аваз хьайитIа, хизандин дуллухдиз талукь делилар герек къведа. Арзадиз кIвалахдин — 10 (кьилдин дуьшуьшрани — 30) йикъан муьгьлетда килигда.
Пособидиз талукь суалар пайда ва адакай гегьеншдаказ малуматар кIелиз кIан хьайитIа, квевай ПФР-дин Дагъустан Республикада авай отделенидин агьалийрихъ галаз алакъа хуьдай центрадиз зенг авуна чириз жеда: 8 (800) 600-03-17. Зенг пулсузди я.
«Лезги газет»
