Зегьметди инсан гуьрчегарда, лугьузва бубайрин мисалда. Гьакъикъатдани, чилин къадир авай, зегьметдал рикI алай инсандиз вири девирра гьуьрмет хьайиди я. СтIал Сулейманан райондин Курхуьрелай тир Велимет Саругъланов районда хъсан зегьметчи, тежрибалу агроном яз чида. Агропромышленный комплекс вилик тухуник лайихлу пай кутунай, яргъал йисара гьакъисагъдаказ зегьмет чIугунай  райондин кьил Нариман Абдулмуталибова и йикъара Велимет Саругълановаз  гьуьрметдин грамота га­на (шикилда).

Лугьун лазим я хьи, В.Саругъланов кьилин образование авай агроном я. Ада хейлин йисара райондин набататар хуьдай станцияда кьилин агрономвиле, начальниквиле,  хуьруьн майишатдин кIвенкIвечи карханайрикай сад хьайи “Самурский” совхоздин директорвиле кIвалахна. Совхозар чкIайла, Ве­лимета чилин участок арендада къачуна, ана хутун багъ кутуна, емишрин бул бегьерар гьасилна.

Эхиримжи вахтара тежрибалу агроном Велимет Саругъланова неинки районда, санлай республикада хуьруьн майишатдин кIвен­кIвечи карханайрикай сад тир “Полоса” ООО-да бригадирвиле кIвалахзава.

— Хъсан пешекарар виринра герек я, — лугьузва райондин хуьруьн майишатдин ва недай суьрсетдин управленидин начальник Мегьамедзагьид Бабаева. — Гьавиляй дуьнья­дин лап хъсан технологийрал бинеламиш хьана кIвалахзавай карханади кIвалахал Ве­лимет хьтин пешекардиз теклифун дуьшуьш­дин кар туш.

Виликдай хейлин йисара чIурухъан чка яз цацарини къаратикендин валари кьунваз хьайи Курхуьруьн кьилихъ галай чкада шуьмягърин багълар кутунва, анаг хъсан гьалда ава. Велимет Саругъланова чаз лагьайвал, карханада шуьмягърин багълар кутунин кIва­лах давамарни ийида. Алай вахтунда карханадихъ 600 гектар шуьмягърин багъ ава.

— Ихьтин багъларин майданар артухаруни ин­санриз кIвалахдин алава чкаяр арадал гъизва, — лугьузва В.Саругъланова. — Ида чи­лин къа­­дир авай инсанрин гуьгьуьларни хкажзава.­

Хазран Кьасумов