И йикъара чав Ямало-Ненецкий автономный округдик (ЯНАО) акатзавай Ноябрьск шегьерда яшамиш жезвай лезги хва Арзу Пирметова грекринни римлуйрин жуьреда кьуршахар кьунай ветеранрин арада дуьньядин чемпионвилин тIвар къазанмишнавайдакай шад хабар агакьна…
ЦIинин йисуз кьуршахар кьунай (иник азаддаказ ва грекринни римлуйрин жуьреда кьуршахар кьун акатзава) ветеранрин арада дуьньядин чемпионат Грециядин Лутраки шегьерда кьиле фена. Ана, кьилди къачуртIа, грекринни римлуйрин жуьреда кьуршахар кьунай дуьньядин 20-далай виниз уьлквейрай тир 300-дав агакьна спортдин ветеранри иштиракна. Яшариз килигна абур 5 категориядиз пайнавай. Арзу Пирметова лагьайтIа, 78 кг-дал къведалди заланвал авайбурун арада вичин устадвал къалурна. Дуьньядин чемпионвилин тIвар — спортдин рекье еке агалкьун — чна адаз рикIин сидкьидай тебрикзава, адахъ мягькем сагъвал, хизанда хушбахтлувал хьун алхишзава…
Мадни а кар шадвилелди къейд ийиз кIанзава хьи, чи ватандашдин пайни кваз дуьньядин и чемпионатда Россиядин хкянавай командади вири санлай 24 медаль къазанмишна (абурукай 6 — къизилдинбур, 7 — гимишдинбур ва 11 буьруьнждинбур я), ам 2-чкадиз лайихлу хьана. 1-чка США-дин ва 3-чкани Ирандин хкянавай командайри кьуна.
Малум хьайивал, Арзу Пирметован диде-буба Азербайжандин Хачмаз райондай я. Ам Ноябрьск шегьерда дидедиз хьана. Вичини ана хизан кутунва. Уьмуьрдин юлдашдихъ галаз пуд аялдиз тербия гузва. А.Пирметов спортдал аял чIавалай машгъул жезва. Адакай са шумуд сеферда ЯНАО-дин, Тюмендин областдин чемпион, Вирироссиядин ва уьлкведин Кубок патал акъажунрин гъалибчи хьана. Ам грекринни римлуйрин жуьреда кьуршахар кьунай спортдин мастер я. Ада “Олимпиец” спортдин школада вердишвилер къачуна. Машгьур тренерар тир Иван, Михаил, Павел ва Игорь Карповрин гъилик ада вичин устадвал хкажзава.
Рагнеда Рамалданова
