Мукьвара машгьур публицист, политолог, ДГУ-дин электронный СМИ-рин кафедрадин заведующий, ВГТРК-дин общественно-политический “Дагъустан” ТВ-дин регьбер, РД-дин Халкьдин Собранидин депутат Ильман Алипулатов “Лезги газетдин” редакциядиз илифна ва редколлегиядихъ галаз итижлу гуьруьш кьиле фена.
— Ильман Субгьанович, чна Куьн милли газетдин редакциядиз атун хушвилелди тебрикзава, — лагьана кьилин редактор Мегьамед Ибрагьимова. — ГьикI лагьайтIа, мукьвал йисара редакциядиз я чи депутатар, я чIехи къуллугърал алай ватанэгьлияр атайди туш. Чна Квез вири коллективдин ва чи кIелзавайбурун патай республикадин парламентдиз нубатдин сеферда хкягъун мубаракзава.
— Пара сагърай. Редакциядиз атуникай менфят къачуна заз вири сечкичийриз сагърай лугьуз кIанзава. Абуру захъ авунвай ихтибар екеди ва важиблуди я, — лагьана И.Алипулатова. — Зун абурун умудар крариз элкъуьриз алахъда. Им зи везифа я. Мадни лагьайтIа, зун парламентда зи сечкичийрин, халкьдин итижар хуьзвай векил я. Гьавиляй зун меркезда авай чи халкьдин медениятдин, эдебиятдин, яшайишдин центр тир редакциядизни атанва. ГьикI лагьайтIа, халкьдиз талукь вири месэлайрикай рахазвайди чи милли газет я.
— Куьне лап дуьз лугьузва, Ильман Субгьанович. Квезни чизва, алай вахт регьятди туш. Чун патални гьакI я. Редакциядин коллектив кьери жезва. Мажибар гъвечIибур тирвиляй алакьунар авай жегьиларни редакциядиз къвезвач. Республикадин маса газетрив гекъигайла, чи тиражни екеди я. Газетдин сайтдини вичикай гзафбуруз хабар гузва.
— Баркалла, юлдашар. И кардал за дамахзава. Заз республикадилай къецени дустар, кеспидин юлдашар ава. Абуру зенгер ийиз, тикрарда: “Ильман Субгьанович, чна вири хабарар “Лезги газетдин” сайтдай кIелзава. Ада пешекарвилелди кIвалахзава. Аферин”. Ихьтин гафар ван хьайила, чидани заз гьикьван шад жезватIа. Сагърай куьн, гьа икI зегьмет чIугу.
— Мукьвал вахтара редакциядив гьукуматдин патай агакьай галайвилер авач, — давамарна рахун М.Ибрагьимова. — Газетдин 100 йисан юбилейди умудар кутунвайди тир. Чи министерстводи газетдин тарихдин ктаб акъудун вичин хивез къачуна. Коллектив премийралди къейд ийидай мумкинвални авач. Белки, спонсорар, меценатар майдандиз экъечIин. ФЛНКА-дин регьбер Ариф Керимовани адан хва Токай Керимова редакция авай дараматдин 7-мертебада ремонт авун патал 900 агъзур манат гана. Юбилейдиз талукь медаль акъудун Ставрополдин парламентдин депутат Казбек Агъаларова вичин хивез къачуна. Юбилейдин мярекатни ноябрдин юкьвара тухуз кIанзава.
— Хъсан меслят я. Захъ галаз алакъа хуьх ва герек къайгъуйрик зунни экечIда. Мумкинвилер авай чи гьар са ватанэгьлидини милли газетдихъ чин ва гъил элкъуьрун лазим я.
— Ильман Субгьанович, чи халкь кьве государстводин мулкарал яшамиш хьунихъ галаз алакъалу лап четин месэла ава. Амни чIал хуьниз талукьди я. Азербайжан фадлай латин графикадал элячIнава. Ана авай лезги районрин мектебра дидед чIалан ва эдебиятдин учебникар авач. Гьа са вахтунда Дагъустан Республикади ина азербайжан чIал чирзавай мектебар патал дидед чIалан учебникар гьазурзава. И месэла гьялдай са рехъ жагъурна кIанда. Халкьдин Собраниди “Дагъустан Республикадин чIаларин гьакъиндай” закон кьабулдай вахтни хьанва. Гьа закон авачиз хейлин крар кьулухъ язава. Исятда чи мектебра гьафтеда дидед чIалан са тарс гузва. Де лагь, са тарсуна аялдиз чIалан сирер гьикI чирдайди хьуй?
— Инал къейд авур месэлаяр чи комитетдиз талукьбур я, — лагьана И.Алипулатова. — Амма абур зазни ваз кIан хьуналди гьасятда гьял жезвайбур туш. Уьмуьрда чалай аслу тушир гзаф крар кьиле физва. Акьалтзавай несилдини аямдихъ галаз камар къачузва. ЯтIани чна меденият, чIал, адетар, милливал хуьн патал зегьмет чIугуна кIанда. И рекьяй газетди тухузвай кIвалах екеди я. Дидед чIалал диктантар тухун, шегьерра авайбуруз лезги чIал чирдай онлайн-курсар тешкилун, школайрин гъвечIи классра кIелзавайбуруз куьмек патал чIал чирдай учебник акъудун, редакциядин патав кар алакьдай ватанэгьлияр кIватIун… Комитетдини вичин кIвалахда и кар алай месэлайриз кьетIен фикир гуда ва республикадин гьукумдин оганрихъ галаз абур гьялдай рекьерни жагъурда.
Инал кватай ихтилатдикай рахайтIа, зун рази я. “Лезги газетдин” редакция гьукумдин органра авай чи халкьдин векилар тир къуллугъчияр, депутатар агуддай, кIватIдай ва санал герек месэлаяр гьялдай мумкинвилер жагъурдай центрадиз элкъуьрна кIанда. И жигьетдай зи патай квев гьамиша куьмек агакьда. Авайвал лагьайтIа, чи везифаяр садбур я ва чун са командани я. Чна Дагъустан Республикадин Кьил Сергей Алимовичан регьбервилик кваз Дагъустан, чи халкь, хуьрер, кIвалер, мадни абад авун патал зегьмет чIугун герек я.
Хийир Эмиров
