22-октябрдиз Докъузпара райондин Къаракуьреда государстводин хуьрерин мулкар виликди тухунин программадин сергьятра аваз тухванвай хъвадай целди таъминардай цIийи водовод кардик кутуниз талукь шад мярекат кьиле фена.
Ана райондин кьилин заместитель Акиф Балакишиева, РД-дин “Дагсельхозстрой” ГКУ-дин директордин заместитель Гитинамегьамед Абдулаева, РД-дин хуьруьн майишатдин ва суьрсетдин министерстводин хуьрерин мулкар еримлу авунин отделдин начальник Зураб Исуева, Докъузпара райондин УСХ-дин начальник Аким Гьажиева, Къаракуьре, ЦIийи Къаракуьре хуьрерин кьилери, чкадин агьалийри иштиракна.
Эвел кьиляй Акиф Балакишиева мугьманар тебрикна, вичин ва муниципалитетдин кьилин патай Дагъустан Республикадин руководстводиз разивал малумарна, къурулушдин объект эцигзавай чIавуз арадал атай хци вири месэлаяр гьялунив къайгъударвилелди эгечIунай РД-дин “Дагсельхозстрой” карханадин руководстводиз сагърай лагьана. Яд гьар са касдин яшайиш патал иллаки важиблу шей, уьмуьрдин чешме тирди къейд авуналди, ада райондин агьалийриз важиблу и месэла кьилиз акъатун мубаракна. Жемятдиз тебрикдин гафар Гитинамегьамед Абдулаевани, Зураб Исуевани лагьана.
Хъвадай целди таъминардай цIийи водовод кардик кутуниз талукьарна, райондин культурадин управлениди концертдин программани гьазурнавай.
Шад мярекатдин сергьятра аваз мугьманри ва райондин кьилин заместителди яру лент атIана ва идалди водоводдин кIвалах башламишнавайди малумарна.
ЦIийи водовод “Къара-булах” чешмедилай башламиш жезва, адан яргъивал 33 километрдиз барабар я. Водоводдилай гъейри, проектдин сергьятра аваз, хъвадай яд хуьз жедай кьве гьавизни (2000 ва 250 кубометрдин) туькIуьрнава. ГьакIни, цIаяр кьур дуьшуьшра яд къачуз жедай алава кьве гьавизни арадал гъанва. Абур вири къурулушдин цIийи объектдик акатзава. Хъвадай цин цIийи турбади райондин хуьрерин 400 майишат ва яшайишдин объектар целди таъминардай мумкинвал гуда.
Къейд ийин, цин цIийи турба тухун патал такьатар федеральный ва региондин бюджетрай чара авунва. Объект эцигунин кIвалахар 2019-йисуз башламишнай, абур “Сем плюс” ООО-ди тамамарна.
Чи мухбир
