Поповади эвер гана

Уьлкведин Роспотребнадзордин кьил Анна Поповади ял ядай  йикъара санихъни фин тавуниз, алакъайрал, гуьруьшрал сер­гьят эцигуниз, гзаф ксар санал кIватI тахьуниз эвер гана. Ихьтин фикир ада Сад лагьай каналдай раижна.

Ада къейд авурвал, ял ядай йикъар ковид чукIунин еришар явашарунин макьсаддалди тайинарнава. Малум тирвал, алай вахтунда коронавирусдиз акси рапар ягъун 84 регионда чарасуз серенжем яз тестикьарнава.

Россияда 30-октябрдилай 7-ноябрдалди ял ядай йикъар яз малумарунин теклиф вице-премьер Т.Голиковади 19-октябрдиз ганай. ТIугъвалдин цIийи лепе явашарун важиблу яз гьисабуналди, уьлкведин Президент Владимир Путина ял ядай йикъарин гьакъиндай къарар акъудна.

Тапан сертификатрин нетижа

Гамалеядин тIварцIихъ галай центрадин директор А. Гинцбурга малумарнавайвал, “Спутник V” рапар ягъайдалай кьулухъ коронавирус акатнава лугьузвайбурун 80 процент къалп сертификатар маса къачунвайбур я. Идакай “ТАСС” чешмеди хабар гузва.

Гинцбурган фикирдалди, и кар махсус анализдин куьмекдалди дуьздал акъудиз жезва.

“Гуя “Спутник V” вакцинадин рапар янава лугьузвайбур залан­диз начагъ жезватIа, им абуру тапан сертификатрикай менфят къачунва лагьай чIал я. Инсанри пул серфна сертификатар къачузва, ахпа чпин пулдихъ начагъ жезва, рекьизва. Абуру чпи чеб алцурарзава. Гьа са вахтунда абуру масабурни хаталувилик кутазва”, — лагьана ада.

Векилхана гуьнгуьна хутазва

Евросоюздиз мукьвара Кабулда векилхана ачух хъийиз кIанзава. Идакай “Новости” РИА-ди хабар гана.

Къейдзавайвал, Афгъанистанда цIийи кьилелай ачух хъийидай векилханада Европадин къецепатан алакъайрин къуллугъчияр жеда, гьакIни адакай ЕС-дик квай уьлквейрин дипломатривай менфят къачуз жеда.

Еврокомиссиядин делилралди, векилханадин кIвалах гуьнгуьна хтун “Талибандин” (Россияда къадагъалу тешкилат) гьукум­ кьабулнава лагьай чIал туш. Векилханадин макьсад  Афгъанистандин халкьдиз куьмек гун я. Гьар гьикI ятIани, талибрихъ галаз алакъалувилелди кIвалахуниз мажбур я.

Израиль гьазур жезва

Израилдин ВВС-ди 2022-йис алукьайдалай кьулухъ Ирандин ядерный объектрал гьужумар кьиле тухун фикирдиз къачунва. Идакай “Times of IsraeI” чешмеди раижнава.

Са жерге женгинин гьерекатар кьиле тухун патал пулдин такьатар чара авунва, ВВС-дин аскерар вердишарунин план туькIуьрнава.

Алай йисан гатуз США-дин Госдепартаментди 2015-йисан ядерный икьрардал хтун патал Вашингтонди Тегерандихъ галаз рахунар кьиле тухун давамарда лагьана хабар ганай. Амма Ирандин цIийи президент И.Раисиди США-дин президент Ж. Байденахъ галаз гьатта Ирандиз акси яз малумарнавай вири санкцияр къуватдай вегьейтIани гуьруьшмиш жез кIанзавач лагьана.

Хийир пара жедайвал

Индиядин духтур-пегьризчи Н. Агарвалан фикирдалди, какаяр недайла абурукай жезмай кьван гзаф хийир хкатдайвал хьана кIанда. Адан фикир “Times of India” чешмеди раижнава.

Пешекардин гафаралди, какадин лазни къиб кьведни санал тIуьн герек я. Амма хъипедик гзаф хийир ква. Чрадайла хъипеди вичин кIалуб хуьн ва ам лацан винел аламукьун герек я. Къейдзавайвал, какади инсультдин, рикIинни дамаррин азаррин хаталувал тIимиларзава. Витамин А квайвиляй, абур вилерин экв патални хийирлу я. Яхун жезвайбурузни какайри куьмек гуда.

Кьитвили мажбурда

Политолог Д. Корнейчукан фикирдалди, Украинадин президент В.Зеленский, уьлкведа газдин кьитвал хьун себеб яз “усал хьуниз” ва Россиядин регьбер В.Путинахъ галаз гуьруьш кьиле ту­хуниз мажбур жеда. Идан гьакъиндай “Новости” РИА-ди хабар гузва.

Корнейчука малумарайвал, Зеленскийди гьеле гатуз Россия­дин газ къачуникай фикирзавай, адаз газдин жигьетдай кьитвал же­дайди гьа чIавуз аян хьанвай. Политолог инанмиш тирвал, Москвади мукьвара “Северный поток-2” кардик кутада. Гьа са вах­тунда Киев меслятдал атуниз мажбур жеда. Корнейчука къейд­­завайвал, В. Путинанни В. Зеленскийдин гуьруьш Россиядин регьбердиз мус кIан хьайитIа, гьа чIавуз кьиле фида.

Нетижасуз гьерекат

Сирияда Россиядин аскеррин жергедин вилик бомба хъит­кьин­на. “Новости” РИА-ди хабар гузвайвал, идакай душманвалзавай терефар баришугъ хъувунин рекьяй Сирияда кардик квай Россиядин центрадин векил В.Кулита ихтилатна.

Къейдзавайвал, Россиядин аскеррин десте хъиткьинарунин алахъунар нетижасузбур хьана. Аскеррикай садазни зарар хьанач.

«Лезги газет»