22-24-октябрдиз Дербент шегьерда, мугьманханадин “Алые паруса” комплексда, “ЧIехи бубайрин ирс” лишандик кваз жегьилрин тарихдинни ватанпересвилин форум кьиле фена. Ана Урусатдин жуьреба-жуьре регионрай атанвай алимри, тарихчийри, сиясатчийри, журналистри ва масабуру иштиракна.
Форумдин сад лагьай юкъуз Дагъустандин мугьманар патал къадим шегьерда сиягьат тешкилнавай: къецепатан регионрай атанвайбуруз вири дуьньядиз машгьур Дербентдин къеле иллаки итижлу хьана.
Кьвед лагьай юкъуз форум асул мярекатри давамарна. Модератордин везифаяр тамамарзавай ФЛНКА-дин Советдин член Гьуьсен Шагьпазова РФ-дин Президентдин Администрациядин Руководителдин заместитель Мегьамедсалам Мегьамедован къул алай чар кIелна, адан патай форумдин иштиракчияр тебрикна. Гуьгъуьнлай трибунадихъай ФЛНКА-дин президент, милли алакъайрин жигьетдай РФ-дин Президентдин патав гвай Советдин член Ариф Керимов, “Дом народов России” ФГБУ-дин директор Андрей Березин, РАН-дин Урусатдин тарихдин Институтдин директордин заместитель, тарихдин илимрин доктор Виктор Захаров, РД-дин жегьилрин крарин рекьяй министрдин заместитель Патимат Омарова, РД-дин милли сиясатдин ва динрин крарин рекьяй министрдин заместитель Арсен Магьмудов, РД-дин медениятдин ирс хуьнин рекьяй кардик квай Агентстводин кьилин сад лагьай заместитель Таиса Алибутаева, гуржийрин милли медениятдин федеральный автономиядин регьбер Давид Цецхладзе ва масабур рахана. Чпин рахунра абуру тешкилнавай мярекатдин важиблувал, Дагъустандин халкьарин ирс хуьнихъ вири жемият патал авай метлеб къейдна.
Йикъан кьвед лагьай паюна форумдин кIвалах кьилдин секцийра давам хьана: ватанпересвилин тербия ва гражданвилин къанажагъ мягькемарун; экстремизмдиз ва къалп тарихдин гьакъиндай таблигъат авуниз акси карда малуматрин кIвалах тешкилун. И темайриз талукь месэлайрай Патимат Омаровади, Таиса Алибутаевади, тарихдин “Урусат — зи тарих” паркунин регьбердин кьилин заместитель Исмаил Эмирханова, политолог Игорь Димитриева, Евгения Михалевади, Амиль Саркарова, Идрис Газдиева ва масабуру авуна. Кьилди къачуртIа, А.Саркаров Урусатдин къанунрин ва милли тайифайрин тежрибадин бинедаллаз Дагъустандин халкьарин арада милли алакъаяр идара ийидай къайдайрикай, И.Газдиев экстремизмдин, радикализмдин къармахра гьат тавун патал жегьилрин арада тешкилна кIанзавай серенжемрикай рахана.
Форумдин сергьятра аваз иштиракчияр ФЛНКА-ди гьазурнавай “Хуьрер — Дагъларин уьлкведин игитар” фильмайрин циклдиз килигна.
Агьмед Магьмудов
