Чи ватанэгьлияр — гьар сана

Муаллимвилин, спортдин тренервилин баркаллу пешеяр хкянавай хейлин лезгийри уьлкведин жуьреба-жуьре пипIера агалкьунралди кIвалахзава. Пензадин областда яшамиш жезвай  Вакъиф  Исраилович  Къужаевни  гъурбатда нуфуз ва гьуьрмет къазанмишнавай, вичин кеспидал рикI алаз кIва­лахзавай чи ватанэгьли я.

Ам 1975-йисан 16-январдиз Ах­цегь райондин Мацарин хуьре диде­диз хьана. 2003-йисалай ада Пен­задин областдин Колышлей поселокда самбодай тренервиле кIва­лах­зава. Пензадин госпединститут куьтягьай 2011-йисалай инихъ гьа са вахтунда мектебда физкультурадин муаллимвилени зегьмет чIугвазва.

Гьакъисагъвилелди кIва­­­лахза­вай ватанэгьлиди вич еке алакьунар, тежриба авай пешекар, спортдин устад тирди фадлай успат­нава. И гьа­къин­дай адаз ганвай кьван са жерге шабагьри шагьидвалзава.

Жегьилриз тербия гунин, абур спортдал желб авунин карда къазанмишнавай агалкьунриз килигна, чи ватанэгьлидиз Пензадин об-ласт­­дин образованидин, спортдин министерствойри хейлин грамотаяр, чухсагъулдин чарар ганва. Дагъ­видин зегьмет Россиядин образованидинни илимдин министерстводи гьуьрметдин грамотадалди къейдна. Акьалтзавай несилрин арада сагълам уьмуьрдин табли­гъат тухунин, спортни физкультура­ машгьур авунин кардай адаз областдин спортдин министерстводи ги­мишдин лишан ва гьуьрметдин гра­мота гана. Мукьвара, муаллимрин суварин югъ къейд авур 5-октябрдиз, Вакъиф Къужаевахъ мад са агалкьун хьана — адав РФ-дин тербиядинни марифатдин лайихлу къуллугъчидин шабагь вах­кана.

Адан гъилик вердишвилер къачузвай же­гьил­рин арадай гзаф чемпионар, акъажунрин призерар акъатнава. Бязибурукай самбодай Россиядин мастерар хьанва.

Вакъиф муаллимдин хизанда пуд велед ава. ЧIехи хва бубадин геляй фенва — физкультурадин муаллимвиле ва самбодай тренервиле кIвалах­зава. Руш Камилла Пензадин областда заланвилин кьве дережадай самбодин чемпионка яз пуд ла­гьай йис я. Идалайни гъейри, Камилладикай грэпплингдай кьве сеферда областдин чемпионка хьана. Алай йисан мартдиз аскервилин буржи тамамардайла телеф хьайибур ри­кIел хкуниз талукьарна 7-сеферда самбодай кьиле фейи Россиядин акъа­жунра Камиллади 3-чка кьуна. Аквазвайвал, спортсменрикай ибарат хизан арадал атанва.

Къуй вири ватанэгьлийрихъ гьар са карда агалкьунар хьурай!

К. Ферзалиев