Дагъустандин Кьилин пресс-къуллугъди хабар гузвайвал, республикада агьалийриз коронавирусдиз акси рапар язавай духтурриз гун патал чкадин бюджетдай 200 млн манат пул чара ийидайвал я. Федеральный бюджетдай ахъайзавай такьатарни кваз и макьсадриз регионда, санлай къачурла, 500 млн манат пул харжда.
Пресс-къуллугъдин делилралди, вирусдиз акси рапар ягъун патал республикада бес-кьадар пунктар (стационардин, мобильный, санай масаниз фидай) кардик кутунва.
Къейд ийин хьи, инсанрик коронавирус квани, квачни тайинарунин жигьетдай ахтармишунар кьиле тухун патал алай йисан гатуз 67 млн манат пул чара авунай.
Вацран эхирдилай
Ислен юкъуз Махачкъалада Дагъустандин Кьил Сергей Меликован гуьзчивилик кваз республикада коронавирусдин вилик пад кьунин жигьетдай кардик квай Оперштабдин заседание кьиле фена.
Мярекатдин сергьятра аваз малум хьайивал, октябрдин эхирдилай гатIунна са жерге идарайриз фин патал агьалийри коронавирусдиз акси раб янавайди тестикьарзавай QR-код къалурна кIан жеда. Ихьтин код “Госуслуги” порталдин куьмекдалди къачудай мумкинвал ава.
Къейд ийин хьи, Дагъустанда эхиримжи йикъара тIугъвалдик начагъ жезвайбурун, рекьизвайбурун кьадар гзаф хьанва. И кардихъ галаз алакъалу яз, тIугъвалдин вилик пад кьунин жигьетдай цIийи серенжемар кьабулиз эгечIнава.
Йикъан къене республикадин азарханайриз коронавирусдик ва стIалжемдик начагъ хьанвай 135 кас агакьарзава. Духтурри къейдзавайвал, фендигар азардикай хуьнин карда виридалайни менфятлу рехъ адаз акси раб ягъун я.
«Лезги газет»
