ТIугъвалди мажбурзава

Вице-премьер Татьяна Голиковади коронавирус чукIунин лепе явашарунин мураддалди 30-октябрдилай 7-ноябрдалди россия­вияр патал ял ядай йикъар тайинарунин патахъай авур теклиф Россиядин Гьукуматдин председатель Михаил Мишустина разивилелди  кьабулна.

М.Мишустина “Россия-24” телеканалда малумарайвал, алатай йисузни ихьтин серенжемар кьабулуни хъсан нетижаяр гана.

“Виликамаз серенжемар кьабулун, гьерекат авун герек я. Хъсан теклифар вири умумиламишна кIанда”, — лагьана премьер-министрди.

“Лента.ру” чешмедин делилралди, Т.Голиковади бязи регион­­ра гьатта 23-октябрдилай ял ядай йикъар малумарун теклифна.

ТIугъвалди цIийи серенжемар кьабулуниз мажбурзава. 19-ок­тябрдиз Россияда коронавирусдик 1015 кас кьена — им цIийи ан­тирекорд я. Вирус акатзавай ксарин кьадар чи уьлкведа эхиримжи йикъара 30 агъзурдалайни алатзава.

Уьлкведин Роспотребнадзордин кьил А.Поповадин гафа­ралди, ковид акатзавайбурун кьадар 79 регионда хкаж хьанва, анжах 6 регионда тIугъвалдин жигьетдай пайгарвилин гьалар ава. Къейдзавайвал, эхиримжи вахтара мектебра кIелзавайбурун ва 60 йисалай виниз яшара авайбурун арада коронавирус акатзавайбурун кьадар артух жезва. А.Поповадин фикирдалди, вирусдихъ галаз женг тухун патал кьабулзавай серенжемар бес кьадардинбур жезвач. Гьа са вахтунда ада рапар ягъунин нетижада коронавирусдин стIалжемди азият гузвай дуьшуьшар тIимил хьан­вайдакай ихтилатна.

Малумарзавайвал, са жерге регионра инсанриз къуллугъ ийизвай пешейрай кIвалахзавай ксар патал коронавирусдиз акси рапар ягъун чарасуз серенжем яз тестикьарнава. ИкI, и йикъара Крымдани бязи ватандашар патал чарасуз вакцинация кардик кутунва.

Тереф хуьдайвал я

США-дин оборонадин министр Л.Остина Гуржистандизни Украинадиз фейи вахтунда и уьлквеяр НАТО-дик кутунин шартIар веревирддайвал я. США-дин оборонадин министерстводин сайтдин малуматар “Лента.ру” чешмеди раижнава.

Къейдзавайвал, Остина Гуржистанни Украина патал “НАТО-дин ракIарар ахъа я” лагьана. И кIватIалдик экечIун патал ада уьл­квейрин кьилевайбуруз бязи дегишвилер кьиле тухун теклиф­нава. Идалайни гъейри, Пентагонди Гуржистанни Украина гуя Россиядикай хуьн хиве кьунва.

“Википедиядиз” тешпигь чешме жеда

2022-йисан гатфарихъ Россияда “Википедиядиз” ухшар махсус портал пайда жеда. Ам арадал гъун патал РФ-дин Гьукуматди­ 2 миллиард манат кьван пул серфдайвал я. Идакай “Интерфакс” чешмеди хабар гузва.

Совфеддин ва Госдумадин векилри и проект важиблуди ва ге­рекди яз гьисабзава. Къейдзавайвал, “Википедиядиз” ухшар ин­тернет-чешмеда россиявияр патал гьакъикъи ва менфятлу малуматар жеда.

Ихьтин проект кардик кутунин теклиф 2016-йисуз а чIавуз РФ­-дин Гьукуматдин Председателдин къуллугъдал хьайи Д.Мед­ведева ганай.

Есирар азадна

19-октябрдиз Азербайжандин гьукумдарри есирвиле кьунвай вад эрмени азад хъувуна. Россиядин арачивал аваз азад хъувур­виляй есирар чи уьлкведин ВКС-дин самолетда аваз Еревандиз ахгакьарна. “Новости” РИА-дин делилралди, идакай РФ-дин оборонадин министерстводи хабар гана.

“Дяведин гьерекатар акъвазарун патал пуд терефди кьабулай къарар тамамарунин месэладай Россияди кIвалах тухун давамарда”, — лагьанва малуматда.

Гьазур я

Украинадин президент В. Зеленскийди вич Россиядин регьбер В. Путинахъ галаз гуьруьшмиш жез гьазур тирдакай лагьанва. Идакай “ТАСС” чешмеди хабар гузва.

“Гьи жуьреда хьайитIани, Украина Россиядин Президентдихъ галаз гуьруьш кьиле тухуз гьазур я, чна итиж ийизва”, — лагьана В.Зеленскийди. Ада гьакIни Германиядин, Россиядин, Украинадин ва Франциядин арада гуьруьш кьиле финик умудар кутунва. Зеленскийдин гафаралди, и гуьруьшдизни Киев гьазур я.

Идалай вилик Кремлдин векил Д.Пескова къейд авурвал, Украинадин гьукумдаррин гьерекатри Путинанни Зеленскийдин арада гуьруьш кьиле финиз манийвалзава. Адан гафаралди, гуьруьш кьиле тефинин себебрикай сад Киевди Минскдин икьрарар кьилиз акъуд тавунихъ галаз алакъалу я. Пескова ихтилат авурвал, Зеленскийдихъ галаз суьгьбетар авун четин я, вучиз лагьай­тIа ада гуя Россия Донбассдин къалмакъалдин иштиракчи я лугьуз, терсвилелди вичин фикир илитIзава.

Алимри къурху кутазва

Великобританиядин алимри малумарнавайвал, “дельта” штаммдилайни бетер коронавирусдин жуьре пайда хьун мумкин я. Алимрин малумат “FinanciaI Times” чешмеди раижнава.

«Лезги газет»