Чна виликамаз хабар гайивал, 16-октябрдиз Сочида чи машгьур спортсмен Мугьаммед Эминова чемпионвилин чIул хуьниз талукьарнавай нубатдин бягьс кьиле тухвана. Чи алхиш адахъ “галукьна” — лезги халкьдин викIегь хва Сочидай гъалибвал гваз хтана, чемпионвилин чIул ада еке устадвилелди хвена…
Спортдал рикI алай ксари яргъалди давам жедай бягьс вилив хуьзвайтIани, чи ватандашдиз масакIа хъсан акуна. Еке устадвал аваз, амма — куьрелди, кьилинди, инанмишвилелди гъалибвал къазанмишна. Бягьсиниз экъечIнавай Роман Силагадзе магълуб авун патал Мугьаммедаз кьве декьикьадилай са тIимил артух вахт лазим атана… Вахт амаз, гьеле сад лагьай раундда, Мугьаммеда, “гильотинадикай” (спортда и къайдадиз ганвай тIвар) менфят къачуналди, Роман Силагадзе “бамишарна”. Романа Мугьаммедаз вичихъ бягьс давамардай къуват амачирди ишарадалди къалурайла, рефери бягьс акъвазаруниз мажбур хьана.
Какахьай единоборствойрай (ММА) бягьсер кьиле тухунал машгъул тир Россиядин виридалайни чIехи промоушендин (Fight Night Giobal) сайтда хабар ганвайвал, М.Эминова икьван гагьда тухвай вири бягьсерни кваз гила 16 сеферда гъалибвал къазанмишна.
РикIел хкин: М.Эминован ери-бине Мегьарамдхуьруьн райондин Хуьрелрин хуьряй я. Ам Каспийскда яшамиш жезва. ММА-дилай гъейри, спортдин маса жуьрейрайни адахъ еке агалкьунар ава. ИкI, кьилди къачуртIа, М.Эминов комбат джиу-джитсудай дуьньядин ва Европадин чемпион, спортдин ва женгинин самбодин жуьрейрайни Дагъустандин чемпион я.
Чна ада спортдин рекье мадни еке кукIушар муьтIуьгъардайдак умуд кутунва.
Рагнеда Рамалданова
