Дагъустандин Р. Гьамзатован тIварунихъ галай милли библиотекадин край чирдай ва милли эдебиятдин отделда “Булахар дагълара жезвайди я” тIвар гана Россиядин журналистрин ва писателрин Союзрин член, Дагъустандин культурадин лайихлу работник, Россиядин Федерациядин культурадин работникрин профсоюздин, РФ-дин алакъадин ва массовый коммуникацийрин министерстводин, РФ-дин журналистрин Союздин, РД-дин культурадин работникрин профсоюздин гьуьрметдин грамотайрин, Вирироссиядин “КаспНИИРХ”-дин, республикадин “Къизилдин къелем”, “Къизилдин лекь”, “Шарвили” фондунин, Гь. Гьажибегован, РД-дин милли сиясатдин ва динрин крарин рекьяй министерстводин ва маса премийрин сагьиб Нариман Ибрагьимован ктабрин выставка ачухнава.
Выставкада эцигнавай ктабрихъ, журналрихъ, газетрихъ галаз таниш хьайи гьар са касдиз аквазва хьи, Н.Ибрагьимован яратмишунрин сергьятар гегьеншбур ва бегьерлубур я. 1994-йисуз Н.Ибрагьимова советрин девирда «реакционный шаир» лакIаб эцигна, литературадин тарихдай квадарай Хпеж Къурбанан эсерар жагъурна, кIватIна, цIийи кьилелай дуьньядиз ахкъудна. КIелзавайбурув шаирдин сад лагьай кIватIал, 2006-йисуз «Техквердай хтайди» тIвар алаз монография ва 2016-йисуз “Пуд асирдин эдебиятдин пуд кукIуш” ктаб агакьна.
Журналист, публицист, халкьдин тIал алай месэлайрикай кхьизвай автор яз, чапдай адан Арсен Байрамовакай, Артур Муталибовакай, “Гъурбатдикай игитдизни ватан жедач” ва сатирадинни юмордин “Зун итим я, итим” ктабар акъатна.
Библиотекадин край чирдай отделдиз къвезвайбуру, иллаки алимри, студентри Н. Ибрагьимован гъиликай хкатнавай Eтим Эминан, Кьуьчхуьр Саидан, Хпеж Къурбанан, Кьурагь ва СтIал Сулейманан районрикай, Хпежрин хуьруькай кхьенвай ктабар, ада гьазурна акъуднавай “Лезги халкьдин махар”, Абас Исрафиловакай, Радим Халикьовакай, Сергей Муртазалиевакай кхьенвай ктабар хабар кьазва, абур кIелзава.
Выставка фикир желбдайди хьанва. Инсанри адаз хъсан итиж ийизва. Н. Ибрагьимован цIийи ктабар “Зегьерлу кьисас”, “Кьисметдин къекъуьнрал”, “Чи тIал-квал”, “Алемдин чарх” гьинай къачуз жеда лугьуз, хабар кьазва.
Секинат Мусаева
