Халкьдин рикI ала

Мегьарамдхуьруьн район яшайишдинни экономикадин, иллаки меденият вилик тухунин карда муниципалитетдин жемиятдинни сиясатдин “Самурдин сес” газетдин яратмишдай коллективди кьетIен чка кьазва.

Тарихдай малум тирвал, 1951-йисан октябрдиз “Коммунизм патал” тIвар алаз райондин жемиятдинни сиясатдин газет арадал­ гъанай. Адан сад лагьай редактор К.Ш.Хидиров тир.

Гуьгъуьнлай газетдиз Г.А.Ханова, К.Р.Ремиханова, Э.Э.Къа­зи­агьмедова, Г.А.Алиева, К.Н. Рамазанова, Л.Ж.Аллагьвердиева регьбервал гана. Яргъал (1990-2014) йисара газетдин редакторвиле Ж.Д.Мурадалиева зегьмет чIугуна. 2014-йисалай алай йисан июндалди редактордин везифаяр А.А.Исмаилова кьилиз акъудна. Исятда газетдин редактор Расим Абдурагьимов я.

1990-йисуз газетдин тIвар дегишарна, адакай “Самурдин сес” хьана.

Алатнавай йисара газетди кIвачел акьалтунин ва вилик финин жигьетдай еке рехъ атIанва. Райондин жемиятдинни сиясатдин, экономикадинни медениятдин уьмуьрда кьиле физвай важиблу вакъиайрикай хабар гуналди, газетди кIелзавайбурун патай лайихлу гьуьрмет къазанмишна.

Журналистикадин рекье чIугур яргъал йисарин ва гьакъисагъ зегьметдай Фикрет Гьажиев, Алибег Гьасанов, Желил Мурадалиев, Гъани Абетуллаев, Наисат Кьасумова “РД-дин культурадин лайихлу къуллугъчи” лагьай гьуьрметдин тIварцIиз ­ла­йих­лу хьана­.

Къенин юкъуз газетдин чинра райондин уьмуьрдин важиблу хилера кьиле физвай вакъиайрикай, цIийивилерикай макъалаяр чапзава, агалкьунар аваз кьилиз акъудзавай проектрикай район­эгьлияр хабардарзава.

Пешекарвилелди зегьмет чIугвазвай, гьар са кардин гъавурда авай ва гьар са кар кьилиз акъудиз гьазур тир, чпин везифайрив жавабдарвилелди эгечIзавай коллективди чапзавай гьар са нумра кIелдайбу еке итиждивди вилив хуьзва.

За жуван, гьакIни “Мегьарамдхуьруьн райондин методикадин кабинет” МКУ-дин ва муниципалитетдин аялрин яратмишунрин КIвалин коллективрин патай редакциядин коллективдиз газетдин 70 йисан юбилей мубаракзава. Редакцияда зегьме­т чIугвазвайбурухъ мягькем сагъламвал, къелемдин акьалтI тийи­дай хцивал, яратмишунрин рекье мадни еке агалкьунар хьурай!

З.Бабаева,

Мегьарамдхуьруьн райондин

методкабинетдин методист