Мукьвара редакциядив фадлай “Лезги газет” кхьизвайбурукай сад тир СтIал Сулейманан райондин ЦIийи Макьарин хуьре яшамиш жезвай агъсакъал Рамазан Эмиргьамзаевалай 1924-йисуз Махачкъаладин базарда бязи метягьрин къиметар гьихьтинбур тиртIа къейднавай чар агакьна. Саки 100 йис идалай ви­лик авай ва къенин йикъан къиметар гекъигайла аквазвайвал, а йисара са вацра 2-3 манатдихъ хизан тамамдиз недай-хъвадай суьрсетдал таъминариз жезвай. Ша чун килигин гьихьтин къиметар авайтIа а йисара.

Мисал яз, 1924-йисуз рес­пуб­ликадин меркездин базарда са пут гъуьр (тахминан — 17 кг) 35­-40 кепекдихъ маса къачуз жез­вай, са пут картуфар лагьай­тIа, 6 кепекдихъ. ЦIурурай гъери­дин са фунт (тахминан — 400 гр) — 7, 10 кака — 2-3, са фунт шекер — 3-4, са фунт пасукI — 3, са пут се­мечкадин гъери — 76, са фунт чи­чIекар — 2, як — 4-5, запун — 2, нафт — 1, са пут пахлаяр — 24, цIи­­вин 15 кепекдай маса гузвай. КIвалин кайванийривай са аршин (саки метр) чит 3-4 кепекдай ма­са къачуз жезвай.

Алай вахтунда девирарни дегиш хьанва, къиметарни. Чи йикъара шегьердин чкада хизанни галаз са вацра яшамиш хьун патал агъа кIан 30 агъзур манат пул герек жезва. 1924-йисав ге­къигун патал, исятда меркездин базарда авай къиметрихъ галаз таниш жен. Мисал яз, картуфрин 1 кг — 45, цIурурай гъери — 600, семечкадин гъери — 150, шекер — 52, чичIекар — 25, пахлаяр — 100-120, як — 410, ниси — 400-450, 10 кака — 80, са шешел гъуьр (50 кг) 1400 манатдай маса гузва.

Шегьерэгьлийривай недай-хъвадай суьрсет базардинбурулай ужуз къиметрай маса къачуз­ жедайвал, республикадин кьи­левайбурун теклифдалди, Ма­хачкъалада гьар вацра хуьруьн ма­йишатдин метягьрин ме­ке­ра­яр кьиле тухузва. Газетдин алатай нумрадай хабар гайивал, нуб­атдин мекера 16-октябрдиз кьиле фида. Къиметрин жи­гьет­дай са акьван еке тафават авач­тIани, мекерадай къачузвай метягьрин ери базардинбурулай хъсан я.

Агьмед  Магьмудов