“СтIал Сулейманан райондин “Кьасумхуьр-Цмур” рекьин уьцIей чка туькIуьр хъийидай гьалда авач. Алай вахтунда пешекарар цIийи рекьин проект туькIуьрунив эгечIнава. Тахминан са вацран вахтунда ана чиргъ вегьенвай рехъ туькIуьрна куьтягьда” — «Дагестанавтодор» ГКУ-дин пешекардин гафарал асаслу яз, ихьтин хабар пайда хьана 11-октябрдиз республикадин электронный СМИ-рин чинра.
РикIел хкин, са гьафте идалай вилик, 5-октябрдиз, яргъалди къвайи марфарин нетижада уьцIена атай чилин 250 метрдин къатуни хуьрер алакъалу ийизвай “Кьасумхуьр-Цмур” рекьин 200 метрдин участокдиз еке зарар гана. Нетижада райондин 4 хуьруьхъ — Цмурдихъ, Гачалхуьруьхъ, Хуьпуькьихъ ва Ичинрихъ галаз алакъа анжах элкъвена физвай маса рекьяй — “Мамрач-Ташкапур-Аракандин муьгъ” (Кьасумхуьр-Хив) шегьредай хуьз жезва.
Къейд ийин, рехъ чIур хьайи чка райондин кьил Нариман Абдулмуталибова ва рекьерин къуллугъдин пешекарри тади гьалда ахтармишна, арадал атанвай гьалар гуьзчивилик кутуна. Идалайни гъейри, райондин агьалийриз арадал атанвай дуьшуьшдикай ва рехъ агалнавайдакай тади гьалда хабар гана. Идахъ галаз сад хьиз Цмур дередин хуьрериз фидай маса рекьяй улакьрин гьерекат тешкилна.
6-октябрдиз Нариман Абдулмуталибова кьетIен гьаларин вилик пад кьунин ва арадай акъудунин комиссиядин (КЧС) тади гьалда эвер гайи заседание кьиле тухвана.
Кьасумхуьрелай Цмурдал физвай ва 8 километрдин яргъивал авай накьвадин и рехъ агьалийри гьеле 1917-йисалай инихъ ишлемишзавайди тир. Ада СтIал Сулейманан райондин дагълух мулкунал алай 4 хуьруьз къуллугъзавай. 1994-йисалай инихъ и рехъ республикадин балансдал эцигна. Пуд йис идалай вилик шегьреда къир цанай, ам кутугай гьалда туькIуьрнай. Амма, райондин информациядин къуллугъди хабар гузвайвал, 2 гьафтедилай гзаф вахтунда акъваз тийиз къвайи марфарин нетижада рехъ михьиз чIур хьана.
Райондай тир чешмедихъ галаз кьиле фейи ихтилатдай чаз малум хьайивал, чIур хьанвай рехъ туькIуьр хъийидач лугьудай хабарар пайда хьанватIани, умудар гьелелиг атIанвач. Алай вахтунда районда чилин къатар дериндай ахтармишдай пешекарар вилив хуьзва. Гьаниз килигна, гьисабзавайвал, месэла тамамдиз гьялна куьтягьнавач. Малум хьайивал, дагъдин чкадай физвай и рекьин маса участокдални, къванер авахьна, хаталу гьалар арадал атанва.
“Кьасумхуьрелай Цмурдал фидай чIур хьанвай рекьин яргъивал анжах 8 километрдиз барабар тир, элкъвена фидай рекьи 20 километр тешкилзава (адан 1,5 километрдин мензилда къир авач), яни рехъ саки пуд сеферда яргъал жезва. Цмур хуьруьн алай аямдин мектебдиз райондин жуьреба-жуьре хуьрерай физвай аялар патал им четин месэла жезва — гила абур пакамахъ лап фад рекье гьатна кIанзава”, — гьисабзава райондин векилди.
Жасмина Саидова
