Малум тирвал, гьар йисуз кьве сеферда, гатфариз ва зулуз Россиядин Армиядин Яракьлу къуватра ва Милли гвардияда къуллугъун патал яш тамам хьанвай жегьилар тухузва. И важиблу серенжемдиз Дагъустандин военный комиссариат ва шегьерринни районрин махсус комиссияр хъсандиз гьазур жезва, призывни лайихлувилелди кьиле тухузва. Гатфариз Ватандиз къуллугъиз рекье турбурукай ва исятда жегьилар армиядин жергейриз гьазурзавай гьалдикай республикадин журналистриз мукьвара “Замана” газетдин редакцияда кьиле фейи пресс-конференциядал Дагъустандин военный комиссар Дайтбег Мустафаева лагьана.
— И зулуз Россиядин Федерациядин Яракьлу къуватра ва Милли гвардияда къуллугъ авунал 127 агъзур жегьил желбда. И рекъем цIи гатфариз армиядин жергейриз рекье турбурулай са тIимил гъвечIи я,- лагьана Д. Мустафаева.- Дагъустандай армиядиз 3000 кас рекье тунай. Абурукай 2000 жегьил водителар, трактористар тир. Абурук гьакI фельдшерар, связистарни квай. Виридалайни кар алай месэла, чна армиядиз тIугъвалдик начагъ са касни ракъурнач. Талукь комиссийри вири жегьилар ахтармишна. Квез за виликдайни малумарайвал, чна гьар йисуз военный учетда твазвай пешекарар гьазурзава. Шаз чна ахьтин 850 пешекар гьазурна. ЦIи генани гзаф гьазурнава. Гатфарихъ чна икьрардин бинедаллаз 700 дагъустанви кIвалахдал (къуллугъ ийиз) кьабулдайвал авуна. Са тарифлу кар мадни ава. Чи жегьилри хушдиз военный пешеяр къачузва. ЦIи юкьван школаяр куьтягьайбурукай 450 жегьил военный вузрик ва юкьван пешекарвилин училищейрик экечIна.
Кьиблепатан военный округдин штабди тайинарнавайвал, зулухъ Дагъустандай РФ-дин Яракьлу къуватриз ва Милли гвардиядин жергейриз пуд агъзурдалай гзаф жегьилар желбда. Абурукай военный комиссариатдиз талукь курсара кIелнавайбурун, вердишвилер къачунвайбурун кьадар кьве агъзурдав агакьнава. ЦIинин зулун призывдиз талукь ихьтин цIийивални ава. Чи жегьилар Гьавадинни десантдин кьушунризни тухуда.
Д. Мустафаева лагьайвал, республикада уьлкведин Яракьлу къуватра къуллугъдай яшда авай жегьилар гзаф ава. И зулуз армиядиз сифте нубатда яшар къад йисалай алатнавайбуруз эверзава.
Республикадин военный комиссарди къейд авурвал, алай вахтунда республикада муниципальный 52 пунктуна жегьилар кьабулзава, медицинадин комиссияди абур ахтармишзава ва армиядин жергейриз рекье тваз гьазурзава. Сборный пунктара ва фидай рекьерани жегьилар маскайралди таъминарда. Къуллугъдай частариз агакьайла абур кьве гьафтедин карантинда жеда. Призывникар чкайрал агакьардай улакьарни дезинфекция ийизва.
Дайтбег Мустафаева лагьайвал, республикадин военкоматдин вири отделенийра жегьилар армиядиз желб авунин лазим серенжемар пайгардик кваз, истемишзавай къайдада тухузва. Меркездин призывдин пунктуна ва районрин, шегьеррин комиссариатра герек кьадар маскаяр, экспресс-тестер, дезинфекция ийидай шейэр ава. Призывникрин пунктар дистанционный термометрийралди, бактерияр рекьидай тадаракралди таъминарнава. Гьарна медицинадин постар кардик ква. Куьрелди, начагъвал квай жегьилар армиядиз ракъур тавуниз талукь вири серенжемар кьабулнава.
Къейд авун лазим я хьи, жегьилар армиядин жергейриз рекье твазвай и вахт, тIугъвалдик начагъбур гзаф жезвайвиляй, хциди я. Военкоматра ва республикадин призывдин пунктуна жегьилар вири терефрихъай ахтармишзава, коронавирусдик азарлу хьайибурухъ галаз алакъалу хьанатIа чирзава. Гьелбетда, ихьтинбур кьулухъ элкъуьрзава. ТIугъвалдиз акси вири серенжемарни тухузва.
Октябрдин сифтегьан йикъара армиядин жергейриз 200-ев агакьна гадаяр рекье тунва. Призывдин пунктуна абурун вилик республикадин военкоматдин къуллугъчияр, военный частарай жегьилар тухуз атанвай офицерар, диде-бубаяр, общественностдин векилар рахана ва военный партал сифте яз алукIнавайбуруз хъсан насигьатар гана. Малум хьайивал, дагъустанвияр Москвадин ва Воронеждин областра авай частариз ракъурнава.
Нариман Ибрагьимов
