5-октябрдиз “Ахцегь райондин” кьил Осман Абдулкеримован регьбервилик кваз совещание хьана. Йикъан месэлайрикай сад Ахцегьрин ичерин сувар къейд авуниз гьазурвал акун тир.
— Адет хьанвайвал, гьар йисан 15-октябрдиз чна районда «Ахцегьрин ичерин югъ» кьиле тухузва. Сувари райондиз туристар желбуниз (и жигьетдай чаз еке мумкинвилер ава), Ахцегьрин ичер ярж яз машгьуруниз ва жемятди и юкъуз мугьманрихъ галаз къулайдиз ял ягъуниз хъсан таъсирзава. Тестикьарнавай махсус план-графикдин бинедаллаз, 15-октябрдин жуьмя йикъан экуьнин 9-даз Ахцегьа, обелискдин патав, мугьманар кьабулда. Ахпа, Ленинан куьчеда ачухдай гьар жуьре выставкайриз тамашайдалай кьулухъ, суварин кьилин серенжемар (чи хуьрерин кьилди-кьилди майданрал фин, официальный рахунар, концерт…) В.Эмирован тIварунихъ галай багъда тешкилда. Ана гьар са СП-диз вичин майдан, алачух ачухарун патал чкаяр тайинарнава,- малумарна райадминистрациядин кьилин заместитель Вадим Агъасиева.
Къейд ийин, “Ахцегьрин ичер” суварин серенжемрикай сад яз, районда “Ичерин савкьат” тIвар алай мергьяматлувилин серенжем малумарнава. ИкI, ашкъи авай инсанри сад-кьве ящик ерилу ичер кIватIна (абуру ичер райадминистрациядин гьаятдиз гъана кIанзава), абур пар чIугвадай машинраваз Дербентдин, Махачкъаладин аялрин кIвалеризни интернатриз ва яшлубурун кIвалериз садакьа яз тухуда. Ичер авай машинар хемис юкъуз — Дербентдин, жуьмядиз Махачкъаладин аялрин кIвалериз рекье гьатда.
“Коронавирусдин тIугъвалдихъ галаз алакъалу яз, гьайиф хьи, цIи чавай районда “Шарвили” эпосдин суварни кьиле тухуз хьанач. Са тIимил мумкинвал хьанмазди, ингье, ичерин сувар тухузва. И кар са тIвар паталди ваъ, хъсан гьазурвал аваз, чешнелудаказ тешкилна кIанда. Суварик республикадин хуьруьн майишатдин, туризмдин министерствойрин ва маса идарайрин векилри, жуьреба-жуьре районрай къведай мугьманри, симинин пагьливанри, машгьур манидарри иштиракда. Гьар са хуьруьн майдандал (анал хуьруьн тарих, культура, гъилин-тупIун сеняткарвилер, тIуьнар раижда) абуруз халкьдин милли парталар алай са итимдини дишегьлиди чпин хуьруьн кьетIенвилерикай суьгьбетда. Суварин кьилин метлебрикай сад иниз туристар желбун я. Гьавиляй къведай йисуз чна Ахцегьай Кьурагьиз (Грарин хуьруьн дередай яна) 16 километрдин мензилда машиндин хъсан рехъ туькIуьрун фикирдиз къачунва”, — къейдна райондин регьберди.
Дашдемир Шерифалиев
