Мад артух жезва
Россияда са йикъан муддатда (12-октябрдиз) коронавирусдик начагъ 973 кас кьена. Им цIийи антирекорд я. Идакай уьлкведин оперативный штабдин Telegram-каналди хабар гана.
Эхиримжи йикъара ковиддик рекьизвайбурун кьадар уьлкведа артух жезва. ТIугъвал пайда хьайидалай кьулухъ чи уьлкведа 219 агъзурдалай гзаф ксар кьена. Чешмедин делилралди, эхиримжи йикъара начагъ жезвайбурун кьадарни артух жезва. Россияда ковид акатайбурун умуми кьадар 7 миллионни 800 агъзурдалай алатнава.
Дуьньяда коронавирус акатайбурун кьадар — 239, кьейибурун кьадар 5 миллиондив агакьзава. 13-октябрдиз малумарайвал, Москвада мектебра кIелзавайбурун арада ковиддик азарлу жезвайбурун кьадарни эхиримжи кьве гьафтеда 42 процентдин артух хьанва. Идакай “Интерфакс” чешмедиз меркездин мэрдин заместитель А.Раковади ихтилатна.
Адан гафаралди, алатай 4 гьафтеда 280-далай гзаф школьникар коронавирус себеб яз азарханайриз ракъурна. Раковади алава хъувурвал, Москвадин гьукумдарриз мектебар арада мензил аваз чирвилер гунин къайдадал алуддай фикир авач — им лап чара атIайла кьабулдай серенжем я.
Масадан куьмек галачиз
Туьркияди Сирияда террористрин патай авай къурхулувал масадан куьмек галачиз тергдайвал я. “DaiIy Sabah” чешмедин делилралди, ихьтин фикир уьлкведин президент Р.Т. Эрдогана малумарна.
Ада «сабурдин фейжан ацIанва» лагьана. Боевикрин гьерекатар себеб яз, кьетIи серенжемар кьабулун хиве кьунва. Ихьтин фикир ада куьрдери гьужум авурдалай кьулухъ малумарна. Чешмеди къейдзавайвал, гьужумдин нетижада туьркверин кьве офицер кьена.
Сириядин куьрдерин яракьлу тешкилатар Туьркияда террористрин кIеретIар яз тестикьарнава. Сентябрдин эхирра хабар гайивал, Эрдогана В. Путинахъ галаз рахунар кьиле тухвай вахтунда куьрдерин кIеретIрихъ галаз женг тухун патал Москвадивай куьмек тIалабна.
Хатасузвал патал
Россиядинни Эрменистандин оборонайрин министрри (Сергей Шойгуди ва Аршак Карапетяна) Москвада кьиле фейи гуьруьшдал кьве терефди санал кIвалахунихъ, Эрменистандинни Азербайжандин сергьятдихъ, хатасузвилихъ галаз алакъалу месэлаяр веревирдна.
Гъулгъула твазва
Китайдин къецепатан крарин министрдин заместитель Л. Юйчэнан фикирдалди, США-дин, Великобританиядин ва Австралиядин арада пуд терефдин “AUKUS” альянс арадал гъунин макьсад “къайи” дяведик цIай кутун я, ада Тихий океандин регионда ядерный мусибатдин къурхулувал арадал гъида. Адан гафар “Интерфакс” чешмеди раижнава.
Китайдин дипломатди рикIел хкайвал, са шумуд югъ идалай вилик Кьиблепатан Китайдин гьуьле Америкадин цин кIаникай фидай атомдин луьткве малум тушир объектда акьур дуьшуьш арадал атана. Юйчэнан фикирдалди, и агьвалатди са куьн патахъай ятIа виликамаз хабар гузва.
Гуьруьш бегьерлуди яз гьисабна
Эрменистандин премьер-министр Н. Пашиняна Россиядин Президент В. Путинахъ галаз Москвада кьиле фейи гуьруьш бегьерлу хьайиди къейдна. Идакай ада вичин Twitter-аккаунтда кхьена.
“Кьве терефдиз талукь месэлаяр, гьакIни Эрменистандин гьалар веревирдна. Кьабулнавай икьрарар кьилиз акъудун патал алакъаяр давамарда”, — кхьена ада.
Россиядин регьбердихъ галаз Пашинян Москвада 12-октябрдиз гуьруьшмиш хьана. Ихтилатрин вахтунда Пашиняна Россиядин регьбер В. Путиназ Эрменистанда ислягьвални пайгарвал арадал хкуник пай кутунай сагърай лагьана.
“Лента.ру” чешмедин делилралди, алай йисуз В.Путинани Н.Пашиняна пуд гуьруьш кьиле тухвана, 10-далайни гзаф сеферра абур телефонрай рахана.
Белоруссияда гьасилда
Коронавирусдиз акси Россиядин “Спутник V” вакцина Белоруссияда алай йисан эхирда арадал гъунив эгечIдайвал я.
“Новости” РИА-ди хабар гузвайвал, ихьтин фикир а республикадин здравоохраненидин министр Д. Пиневича малумарна.
Катайбур кьабулда
Канададин премьер-министр Д.Трюдоди малумарнавайвал, уьлкведи Афгъанистандай катай 40 агъзур агьали кьабулда.
“Катайбур хатасуздаказ санай масаниз куьчарун патал чна муькуь уьлквейризни и кардик экечIуниз эвер гузва”, — лагьана Трюдоди. Адан гафар “Новости” РИА-ди раижнава.
«Лезги газет»
