Гьамидов Сефербег Гьамидович. Ам заз чиз къанни вад йисалай виниз я. 1990-йисарин сифте кьилер тир. Советрин Союз чкIанвай. Гьарда вичин кьилиз чара аквазвай. Уьлкведа худда приватизация кьиле тухузвай. Партиядин органар амачир. Республикадин печатдин изданийриз — фикир хгудайбурни. Газет подписка авунин гьаларни хъсанзавачир. Чкайрални гьукумдин идараяр дегиш хьанвай, райкомрин, райисполкомрин чкадал администрацияр тешкилнавай. Газетдин работникар, подпискадин месэлаяр гьялиз, районриз рекье гьатна. Кьилин редактор Агъариза Саидовни (рагьмет хьурай вичиз) зун Кьурагь райондиз фена. Чи къаршидиз райондин администрациядин кьилин заместитель Сефербег Гьамидов экъечIна. Ада чун Хпежрин ва Гелхенрин дерейра авай хуьрериз тухвана, герек инсанрихъ галаз гуьруьшмиш хьана, кIелзавайбурун теклифрихъ, меслятрихъ, арзайрихъни яб акална. Нетижани писди хьаначир.
Гьанлай инихъ чна хуш алакъаяр хуьзва ва чун гзаф чкайра, адан кабинетдани, хуьрера, гьукумдин идарайра, жуьреба-жуьре мярекатра гьалтзава. Чна, лезгийри лугьудайвал, санал са кап фу тIуьна. Садрани заз ада вичел алай везифайрин, жавабдарвилин парцикай, дердийрикай шел-хвалнач. Ихтилат анжах авунвай, ийизвай ва гележегдин крарикай фидай. Вучиз лагьайтIа, райондихъ, чкадин агьалийрихъ адан рикI кузвай. Районэгьлийрин гьал-агьвалдикайни адаз хъсандиз малум тир. Университет куьтягьна хтанвай жегьил экономистди райисполкомдин финансрин отделдин заведующийдин заместителвиле, ахпа ВЛКСМ-дин Кьурагь райкомдин кьвед лагьай секретарвиле, КПСС-дин райкомдин инструкторвиле, райондин хуьруьн майишатдин управленидин начальниквиле, райисполкомдин председателдин заместителвиле кIвалахна. Ихьтин къуллугъар хиве гьатнавай касдиз райондин кар алай хилер гьикI вилик тухудатIани чизвай.
1999-йисуз Сефербег стхадин теклифдалди за Кьурагь райондикай сифте яз ктаб кхьена, чапдай акъудна. Ам райондин 70 йисан юбилейдихъ галаз алакъалу авунай. 2004-йисуз чна райондин 75 йисан юбилейдиз талукьарнавай, хейлин алаваяр хъувунвай ва рангарин шикилралди безетмишнавай чIехи ктаб агакьарна районэгьлийрив. С.Гьамидов Махачкъаладиз къуллугъдал хтайлани, алакъаяр давам хъхьана.
Сефербег Гьамидович. Шумал буйдин, гьамиша секин, хъуьтуьл, хъел атайлани, вич хуьдай сабур авай, агъайнавилел масадбур гьейранарзавай, амма, гьахълу истемишунар ийидайла, кьетIивал къалурзавай, вичин гафунин иесивалзавай итим, гьукумдин органрин къуллугъчи. Адан и ерияр, къилихар чиз, ам пуд лагьай сеферда райондин администрациядин кьилин къуллугъдал хкя хъувунай. Идахъ вичин себебарни авай. Виридалайни кар алайди, Гьамидова гьар са районэгьлидин яшайиш хъсанарунин къайгъу чIугвазвай.
Майдин вацран эхирар тир. Гьамидов Сефербегаз гьукуматди “Дуствилин” орден ганвай. Гьа и кар себеб язни чун нубатдин сеферда гуьруьшмиш хьанай. Гьа вахтунда адахъ галаз кьиле фейи суьгьбет къе хьиз рикIел алама.
— Чун жезмай кьван берекат гзаф къведай рекьерихъ къекъвезва, бюджетдин пулар анжах тайин рекьериз харж ийиз алахъзава, — лагьанай ада. — Гьи хуьруьз фейитIани, инсанрихъ яб акалайла, тестикь жезвай хьи, дердияр, къайгъуяр секинсузвал кутадайбур тир. Веревирдер, гьахъ-гьисабар авурла, гьа крар тамамарун патал акьван пулар герек къвезвай хьи, амма абур чи гъилера цIуд йисаралди гьатдачир. Бес дагъвияр патал важиблу месэлаяр гьикI гьялда? Хъвадай яд, хъсан рекьер, муькъвер, къулай шартIарин школаяр, медпунктар кIанзавай. За виридалайни важиблу кIвалахар къейдна ва сифте нубатда абур кьилиз акъуддай серенжемривни эгечIна. Нубатдалди гьар са хуьруьз герек крарни авуна…
Гьа икI Гьамидов вичин везифайрив цIувад йисуз эгечIна. Кукваз, Усар, Квардал хуьрериз цин булахар гъана, Бугъдатепедиз регьятдиз фин патал — Гуьлгери, Бахцугъиз, Ахнигиз, Хпежиз фидайвал, Кьурагь, Хпеж вацIарал муькъвер эцигна, Квардала, Араблярда школаяр, Кумухъа спорткомплекс эцигиз гъиле кьуна. Са шумуд хуьре спортдин майданар туькIуьрна, аялрин бахчаяр ачухна.
Сефербег Гьамидов, гьараяр тийиз, вич алай чка лайихлу краралди къалурзавай инсанрикай я. Вичин чирвилерин, алакьунрин дережа тайин кьакьанда хуьн патални алахъна ам. 1984-йисуз ада, яру диплом къачуналди, Дагъустандин госуниверситетдин экономикадин факультет куьтягьна, ахпа, зегьметни чIугваз, Ростовда партиядин кьилин школада (ВПШ), Вирисоюздин хуьруьн майишатдин институтда (Москва), Ростовдин университетдин юридический факультетда алава чирвилер къачуна. Гьа са вахтунда гьукумдин идарайра кIвалахуналди еке тежриба кIватIна. Гьавиляй бажарагъдикай пай ганвай пешекардиз меркездиз кIвалахиз теклифна. Сифтедай налогрин инспекциядиз, ахпа РД-дин Хатасузвилин Советдиз. Ам Совбездин секретардин заместитель я. Къуллугъ гьикьван жавабдарди ятIа, са тIварцIи лугьузва. Сефербег Гьамидовича вичин везифаяр кардин гъавурда аваз кьилиз акъудзава.
Гьакъисагъвилелди, вичин хиве авай жавабдарвал аннамишиз, государстводин къуллугъ кьилиз акъудзавай кьурагьвидив гьукуматдин патай лайихлу шабагьарни агакьзава. Ам РД-дин государстводин гражданвилин къуллугъдин лайихлу работник я. 2003-йисан майдин вацра Россиядин Президент В. Путина Сефербег Гьамидоваз Дуствилин орден гунин указдал къул чIугуна. Ам гьакI РД-дин Госсоветдин, РД-дин Халкьдин Собранидин гьуьрметдин грамотайрин, РД-дин “Хайи чилихъ авай кIанивиляй” знакдин, РД-дин Кьилин тIвар янавай сятинин сагьибни я.
Сефербег Гьамидов гьуьрметлу хизандин кьилни я. Кьилин образование къачунвай Зульфияди Махачкъалада духтурвиле, Ибадуллагьа Кьурагь райондин администрацияда кIвалахзава. ГъвечIи аялар галай Къизтамум кайвани я.
Пудкъад йисан уьмуьрда Сефербег Гьамидоваз гзаф крар, инсанар акуна. Ам гзаф вакъиайрин шагьидни я. Четинвилерни адал тIимил ацалтнач. Гьар гьикI ятIани, ам гилани гьа виридаз къени, намуслу, гъилер къакъажна, кIвалахдай, датIана инсанрин юкьва авай, абурухъ галаз хушдаказ рафтарвалзавай, районэгьлийрин ва гьакI масабурун патайни гьуьрмет къазанмишнавай Сефербег яз чида.
Нариман Ибрагьимов
