Чи ватанэгьлияр — гьар сана
Уьмуьр ахьтин аламатдин шей я хьи, ада инсан патал гьар юкъуз са цIийивал арадал гъизва, гзаф вахтара — гуьзлемиш тавур жуьрединбурни… Бязибур ватандивай яргъаз акъатзава, анра чпин уьмуьр лайихлувилелди, чешнелувилелди кьиле тухузва. Белоруссияда яшамиш жезвай кьепIирви Камил Агъабалаевич Агъабалаевни гьахьтинбурукай я.
Ам 1948-йисан 1-июндиз Кьурагь райондин КьепIиррин хуьре колхозчидин хизанда дидедиз хьана. Хуьруьн юкьван мектеб куьтягьай 1966-йисуз ам Дагъустандин гьукуматдин медицинадин институтдик экечIна. 1972-йисуз “лечебное дело” пешедай вуз акьалтIарай пешекарди са йисан муддатда Дербент райондин центральный азарханада терапиядин хиляй интернатурада чирвилер артухарна. Агалкьунралди гьукуматдин имтигьан вахкайдалай кьулухъ ам оборонадин министерстводиз рекье туна.
1973-йисан августдин вацралай Туркестандин военный округда яракьлу къуватрин жергейра аскервилин къуллугъ тамамарунив эгечIна. Камил Агъабалаевича сифтедай танкарин полкуна, гуьгъуьнлай учебный медсанбатдин терапиядин отделенида начальниквиле къуллугъна.
1975-йисуз военный округдин командующийдин буйругъдин бинедаллаз ам къуллугъ давамар хъувун патал ГСВГ-диз (Группа советских войск в Германии) рекье туна. Ина К. Агъабалаева 6-гвардиядин дивизияда 1980-йисан июндалди къуллугъ кьилиз акъудна. Адалай кьулухъ Белоруссиядин военный округдани къуллугъ давамарна. Аскервиляй эхкъечIайла, Камил Агъабалаевич Минскдин областдин Слуцк шегьердин чIехибурун поликлиникадин терапиядин отделенидин заведующийвиле кIвалахал акъвазна. Гъурбатда еке гьуьрмет ва нуфуз къазанмишуналди, чи ватанэгьли 2018-йисалди шегьердин агьалийрин сагъламвилин къайгъуда хьана. Аскеррин ва шегьердин агьалийрин сагъламвилин къаравулда акъвазуниз ада вичин уьмуьрдин чIехи пай бахшна — дуьм-дуьз 46 йисуз медицинадин хиле зегьмет чIугуна.
Лайихлу пенсиядиз экъечIна, алай вахтунда Камил духтурди ял язава. Уьмуьрдин юлдаш Фаридадихъ галаз абуру хцизни рушаз тербия гана, чIехи авуна. Хва Рустама Слуцк шегьердин “Желаем здоровья” медицинадин центрада УЗИ-дин диагностикадин пешекар яз кIвалахзава, кьве хциз тербия гузва. Руш Эльмирадизни вичин хизан ава, са веледдиз тербия гузва.
Балугъар кьунал, къарникъузар кIватIунал, хтулрихъ галаз сейрдиз экъечIунал Камил духтурдин рикI ала. Хайи чиливай яргъариз акъатнаватIани, ватан, багърияр рикIелай ракъур тийизвай, алакъаяр хуьн давамарзавай ватанэгьлиди вичин кьисметдилай разивалзава. Гьина аватIани, сагърай чи ватанэгьлияр!
К. Ферзалиев
