ГъвечIи чIавалай спортдал машгъул жезвай, хъсан нетижаяр къазанмишзавай аялрикай чун газетдин чинал жезмай кьван гзаф чап ийиз, абурун агалкьунрикай амайбурни хабардар ийиз, абурун руьгь хкажиз алахъзава. Эхь, чIехи кукIушрихъ камар гъвечIизамаз вегьинихъ, уьмуьрдин жигъир гьеле аялзамаз хкягъунихъ, жагъурунихъ еке важиблувал ава.
Къе чаз газет кIелзавайбур Гьажибегов Ренатахъ галаз танишариз кIанзава. И йикъара Краснодардин крайдин Туапсе шегьерда кьиле фейи Евразиядин акъажунра ада кьве медаль къазанмишна. ИкI, джиу-джитсудай ам — 1 ва грэпплингдай 2-чкайриз лайихлу хьана. Ам талукь дережайрин медалар, грамотаяр ва Кубок гваз хтана. Туапседа кьиле фейи акъажунриз ам Дагъустандин хкянавай командадик кваз рекье тунвай.
Ренат Мегьарамдхуьруьн райондин КьепIир-Къазмайрилай я. Алай вахтунда ада хайи хуьруьн юкьван мектебда 8-классда кIелзава. Ам аял чIавалай дирибаш, са чкадал кьарай къвен тийидай аял тир. Спортдал ам 6 йиса авайдалай инихъ машгъул жезва. Дагъустандин чIехи пай аялри хьиз, спортдин сифте са, ахпа маса жуьредин сирер чириз алахъна. Сифте камар Рената азаддаказ кьуршахар кьунал машгъул хьунилай къачуна, ахпа дзюдодал элячIна. Лугьун лазим я хьи, спортдин кьве жуьредайни адахъ хъсан нетижаяр жезвай, амма жавандин рикIиз грэпплинг иллаки хуш хьана. Алай вахтунда ада тренер Эйнар Экберован гъилик вердишвилер къачуналди вичин устадвал хкажзава.
Ренатан сифтегьан тренер чIехи стха Эмран тир. Адалай гъвечIи стхади вири крара чешне къачузвай. Гаф кватай чкадал лугьун лазим я хьи, Эмран вични спортдал рикIивай машгъул жезвай. Волгоградда медицинадин колледж акьалтIарнавай ада алай вахтунда армиядин жергейра къуллугъзава.
Чна Ренатакай гележегда уьлкведин, дуьньядин кесерлу майданрани вичикай хабар гудай кьегьал спортсмен жедайдак еке умудар кутазва.
«Лезги газет»
