СтIал Сулейманан районда авай ва чи уьлкведин мулкунал виридалайни чIехиди тир шуьмягърин багъдин майдан алай йисуз 1 агъзур гектардив агакьдайвал гегьеншарда. Зулухъай ина 400 гектардин чилел цIийи къелемар цадайвал я, хабар гузва РД-дин хуьруьн майишатдин ва недай суьрсетдин министрдин заместитель Шарип Шарипова.
“Къенин юкъуз Дагъустан шуьмягърин цIийи багълар кутунин карда кIвенкIвечи чкадал ала. Виридалайни еке багъ — дуьньядин лап хъсан технологийрал бинеламиш хьана къелемар цанвай 600 гектар чил — ООО “Полоса” майишатдин сергьятра ава. ЦIийи къе-лемар кутун патал лазим вири кIвалахар тамамарнава. Зулухъай майишатди мад 400 гектарда шуьмягърин къелемар цада. Санлай къачурла, “Полоса” ООО-дихъ и йисуз 1 агъзур гектардин шуьмягърин багъ жеда”, — хабар гана Ш.Шарипова.
Адан гафаралди, фундугъар республикада маса майишатрини гьасилзава, абуруни багъларин майданар гегьеншарун пландик кутунва. “Кьилди къачуртIа, СтIал Сулейманан райондин “Восход” ООО-ди алай йисуз 100 гектардин багъ кутун патал лазим тир вири гьазурвилер акунва. ГьакIни са жерге маса гъвечIи майишатар ава”, — алава хъувуна Ш.Шарипова.
Министрдин заместителди къейд авурвал, мукьвал вахтунда, яни жегьил багълари бегьер гъиз башламишайла, Дагъустандивай Россиядин базардиз къецепатан уьлквейрай шуьмягъар гъизвайбурухъ галаз гьуьжетиз жеда. “Чахъ и рекье кIвалах мадни гегьеншардай ният ава”, — къейдна ада.
СтIал Сулейманан районда шуьмягърин багълар кутунин кIвалах 2019-йисан зулухъай башламишнай ва а чIавуз ина сифтегьан 150 гектарда къелемар цанай. Районда дигидай цик квай 2,5 агъзур гектар чилер ишлемишиз башламишдайвал я. Проект кьилиз акъудун патал тахминан 750 миллион манатдин кьадарда аваз харжияр авун лазим яз гьисабнай.
«Лезги газет»
