Алай йисан 10-октябрдиз пуд лагьай сеферда “Лезги диктант-2021” лишандик кваз международный серенжем кьиле фида. РикIел хкин, 10-октябрь чи халкьдин медениятдин тарихда Лезги чIалан югъ яз гьатнава.
Адет хьанвайвал, “Лезги диктант” гьар йисуз халкьдин тарих, меденият, чIал патал метлеб авай са вакъиадихъ галаз алакъалу ийизва. Сад лагьай сеферда диктант Дагъустандин халкьдин шаир СтIал Сулейманан 150 йисан юиблейдин сергьятра аваз тешкилнай. 2020-йисуз серенжем “Лезги газетдин” 100 йисан юбилейдиз бахшнай. Алай йисуз ам Дагъустандин халкьдин писатель Къияс Межидован 110 йисан юбилейдиз талукьарзава.
Вилик йисарин тежрибади къалурзавайвал, “Лезги диктант” чи халкьдин рикI алай марифатдин серенжемдиз элкъвенва. 2019-йисуз диктант кхьинин мярекатда дуьньядин ругуд уьлкведа яшамиш жезвай лезгийри иштиракнай.
Шаз хьиз, цIини “Лезги диктант” гьам онлайн, гьамни офлайн къайдайра кьиле фида. Дуьньядин гьи пипIе аваз хьайитIани, ашкъи авай гьар са ватанэгьлидивай лезги чIалал диктант кхьиз жеда. И кар кьилиз акъудун патал компьютер, планшет ва я телефон, интернет герек жеда. Диктантда онлайн-къайдада (интернетдин куьмекдалди) иштиракун патал https://lezgidiktant.ru сайтда регистрация авуна кIанзава.
Офлайн-къайдада диктант гьина кьиле фидатIа, нетижаяр гьикI кьадатIа ва абур гьина чапдатIа, чна газетдин нубатдин нумрадай хабар гуда.
«Лезги газет»
