Дагъустандин мулкарал алай къадим мискIинрикай сад яз гьисабзавай Кьурагь райондин Кьуьчхуьррин хуьре авай мискIиндин дарамат чилихъ галаз сад жезвайдакай “Лезги газетди” виликдай хабар ганай. Кьилди къачуртIа, и месэладиз талукь яз газетдин кьилин редактор Мегьамед Ибрагьимова кхьей “Тарих гъиляй акъатзава” макъалада авторди X-XII виш йисарин надир имарат арадиз хкун ва саламатдиз хуьн государстводин везифа тирди къейднай.
“Лезги газетдиз” Дагъустандин медениятдин ирс хуьнин рекьяй кардик квай Агентстводин пресс-къуллугъди (Дагнаследие) хабар гайивал, мукьвара Агентстводин къуллугъчияр медениятдин ирсинин федеральный метлебдин дережадин имаратар авай гьалдиз къимет гун патал Кьурагь райондин Хвереж, Кьуьчхуьр, Хпеж хуьрериз фена. Ахтармишунрин нетижада малум хьайивал, райондин мулкарал алай XVII асирдин минара галай мискIиндин къав пластикдалди кIевнава, цлариз цIийи сувагъар ва обояр янава, пластикдин дакIарар кутунва. Идалайни гъейри, минарадин вини кьиле авай жерге бетондалди мягькемарнава ва ракьун тIвалар (арматура) акIурнава.
Агентстводин пресс-къуллугъдин векилди алава хъувурвал, Кьуьчхуьррин хуьре авай мискIиндин гьални тарифдинди туш, адан къав, дараматдин чил, бязи цлар михьиз чкIанва, ацахьнава. Виликдай мискIиндин цлал ам медениятдин ирсинин федеральный метлеб авай имарат тирди къейднавай махсус кьул алай. Исятда ам хана, чилел аватнава.
Хпежрин хуьре авай XV-XIX виш йисарин мискIиндин гьалдизни пешекарри рази жедай къимет ганач. Абурун фикирдалди, дараматдин сагъвилиз хасаратвилер хьанва.
Вири и крар фикирда кьуна, Да-гъустандин медениятдин ирс хуьнин рекьяй кардик квай Агентстводи винидихъ тIвар кьунвай имаратар саламатдиз хуьдай серенжемар кьабулун патал объектрин иесийрин тIварцIихъ махсус чарар рекье твада.
«Лезги газет»
