27-сентябрдиз Дагъустандин Кьилин везифаяр вахтуналди тамамарзавай Сергей Меликова Токиода кьиле фейи Олимпиададин ва Паралимпиададин гъалибчийрив ва призеррив 2 миллиондилай 4 миллиондал кьван кьадарда аваз пулдин сертификатар вахкана. Идакай “Лезги газетдиз” РД-дин кьилин пресс-къуллугъдин регьбер Низами Гьажибалаева хабар гана.
“Сергей Меликов Токиода кьиле фейи Олимпиададин ва Паралимпиададин къугъунра гъалиб хьайи ва приздин чкаяр кьур спортсменрихъ, гьакIни абурун тренеррихъ галаз гуьруьшмиш хьана. Республикадин Кьили чемпионрив ва абурун тренеррив — 4 миллион, гимишдин ва буьруьнждин медалар къазанмишайбурув, гьакIни абурун тренеррив 2 миллион манатдин кьадарда аваз сертификатар вахкана”, — къейдна пресс-къуллугъдин регьберди.
РикIел хкин: Япониядин Токиода кьиле фейи гатун Олимпиададин XXXII ва Паралимпиададин XVI къугъунра Россиядин хкянавай командайрик кваз 28 дагъустанвиди иштиракна. Абуру спортдин са шумуд жуьредай — азаддаказ кьуршахар кьунай, боксдай, регбидай, фехтованидай, сирнав авунай, кьезил атлетикадай, паратхэквондодай ва столдал къугъвадай теннисдай чпин устадвал ва алакьунар къалурна. Къейд авун лазим я хьи, дагъустанви спортсменри къецепатан 11 уьлкведин хкянавай командайрик квазни иштиракна (вири санлай чи республикадин спортсменри 11 медаль къазанмишна).
Чи уьлкведин хкянавай командадик кваз иштиракай дагъустанвияр 8 (къизилдин — 3 ва буьруьнждин — 5) медалдиз лайихлу хьана.
Рагнеда Рамалданова
