20-сентябрдиз РФ-дин просвещенидин министерстводин векилрихъ галаз хьайи совещанидал РД-дин высший ва юкьван пешекарвилин образованидин идараяр акьалтIарнавай жегьилар кIвалахдалди таъминарунин месэла веревирдна. Ам “Образование” милли проектдик акатзавай “Жегьил пешекарар” федеральный проектда эцигнавай кьадаррив агакьарунин сергьятра аваз тешкилнавай.
Совещанидал кIелунин идараяр акьалтIарнавай жегьил пешекарар кIвалахдалди таъмин хьунин дережа тайинарун патал кьиле тухвай ахтармишунрин нетижаяр ва и карда абуруз куьмек гун патал кьабулзавай серенжемар раиж авур РД-дин образованидин ва илимдин министерстводин пешекарвилин образование виликди тухунин отделдин кьилин пешекар-эксперт Агьмед Мегьамедгъазиева доклад авуна.
Ада хабар гайивал, региондин зегьметдин базарда авай гьалар датIана ахтармишун ва и месэладиз талукь вири терефар чирун патал аналитикадин центр тешкилнава. КIвалахдалди таъмин тахьунин хаталувилик квай ва армиядин жергейра чарасузди тир къуллугъ акьалтIарзавай выпускникрин сиягь туькIуьрнава. КIелунин идараяр акьалтIарнавай, амма кIвалах жагъун тавунвай жегьилриз чпикай делилар авай резюме туь-кIуьриз ва ам лазим идарайрин интернетда авай сайтра эцигиз куьмек гузва. Агьмед Мегьамедгъазиева хабар гайивал, вузра ва ссузра кIелзавайбур патал кIвалахдин азад чкайрин ярмаркаяр тешкилзава.
ГьакIни, малум хьайивал, РД-дин образованидин ва илимдин министерстводи, РД-дин зегьметдин, яшайишдин рекьяй виликди тухунин министерстводихъ галаз санал выпускникар кIвалахдалди таъминарунин карда сада-садахъ галаз алакъаяр хуьниз ва куьмек гуниз талукь план туькIуьрнава. Идалайни гъейри, республикадин ссузри выпускникар кIвалахдалди таъминарунин месэладиз талукь яз агьалияр кIвалахдалди таъминардай центрайрихъ галаз икьрарар кутIуннава.
РФ-дин просвещенидин министерстводин векилри РД-дин образованидин ва илимдин министерстводи кIелунин идараяр акьалтIарай жегьилриз кIвалахдай мумкинвилер тешкилунин рекьяй кьиле тухузвай кIвалахдиз виниз тир къимет гана.
“Федеральный министерстводин векилри РД-дин образованидин ва илимдин министр Ягья Бучаеван теклифдалди туькIуьрнавай “2021-йисан виридалайни хъсан выпускник” реестр кьетIендаказ къейдна. Ана вузрикай, колледжрикай, гьакIни выпускникрихъ галаз алакъалу жедай делилар къалурнава”, — лугьузва РД-дин образованидин ва илимдин министерстводин пешекарвилин образование виликди тухунин отделдин начальник Дина Кунтугановади.
«Лезги газет»
