15-сентябрдиз ДГПУ-дин студентрин са десте муаллимарни галаз Дербент райондин хуьруьн майишатдин ципицIчивилин чIехи карханайрикай сад тир “Татляр” агрохолдингдиз мугьман хьана. Сифте нубатда анин векилри студентриз ципицIлухра сейр тешкилна. Ахпа жегьилри карханадин лежберрихъ галаз санал ципицIар кIватIна.
ДГПУ-дин ректор Нариман Османова гележегда “Татляр” агрохолдингдихъ галаз алакъаяр хуьдайдакай ва республикада ципицIчивал вилик тухуник еке пай кутунай агрохолдингдин регьбер Яхья Гьажиеваз сагърай лагьана.
“Зегьметди инсанар сад-садав агудзава ва дуствилин алакъаяр мягькемарзава, — къейдна Н. Асварова. — Чун советрин девирдин хъсан тежриба цIийи хъийиз алахъда. А вахтара зегьмет кIанарунин хъсан адетар авай. Мисал яз, студентар, зулун бегьер кIватIиз, хуьруьн майишатдин карханайриз рекье твадай. И хъсан адетрал чна чан хкида, — алава хъувуна ада.
Студентрихъ элкъвена рахай Яхья Гьажиева гьар садаз зегьметдин къадир чир хьунихъ еке метлеб авайди къейдна.
— Алай девирдин жегьилрин фикирар са кьадар маса патахъ элкъвенва, — лагьана ада. — Студентвилин хъсан адетар кухтунин, жегьилар зегьметдиз гьуьрмет ийиз вердишарунин теклифар гваз Нариман Асварович зи патав атайла, за ашкъидалди адан теклиф кьабулна. Им лап хъсан кар я. Гележегда чна и рекьяй ДГПУ-дихъ галаз санал кIвалахда.
Къагьриман Ибрагьимов
